“O‘zbekiston 24” telekanalidagi “Axborot 24” informatsion dasturining 6-mart sonida nomi Toshkent sadvo markazi deb o‘zgartirilgan sobiq “Abu Saxiy” savdo majmuasi haqida lavha efirga uzatildi. Unda eski majmua va yangi savdo markaz faoliyatiga doir bir qator raqamlar keltirildi.
“Abu Saxiy” savdo majmuasi faoliyat yuritgan davrda do‘konlar ijarasidan tushgan mablag‘ 381 million so‘mni tashkil qilgan bo‘lsa, Toshkent savdo markazi faoliyatini boshlaganidan buyon bu ko‘rsatkich 1,9 milliard so‘mga yetgan — oradagi farq deyarli besh martaga ko‘p.
Boshqa turdagi ijaralardan tushgan mablag‘ oldin 307 million so‘mni tashkil etgan bo‘lsa, hozirda bu ko‘rsatkich 1,3 milliard so‘mga yetgan — oradagi farq to‘rt barobarni tashkil etmoqda.
Majmuada reklamalar joylashtiriladigan maydonlar ham kengaytirilgan bo‘lib, undan olinadigan foyda oz emas, ko‘p emas 30 barobarga oshgan (“Abu Saxiy”da 4 million so‘m bo‘lgan, Toshkent savdo markazida — 120 million so‘m).
Avtoturargoh va boshqa xizmat ko‘rsatish turlaridan tushadigan daromad ham deyarli ikki barobarga ortgan (“Abu Saxiy”da 1,2 milliard so‘m bo‘lgan, Toshkent savdo markazida — 2 milliard so‘m).
Yuklarni saqlash xonalari ijarasi uchun tushum 70 million so‘mdan 460 million so‘mga, ya’ni, 6,5 barobarga oshgan.
2017-yilda “Abu Saxiy” savdo markazi faoliyatida bojxona to‘lovlaridan tushgan foyda 82 milliard so‘mni tashkil etgan bo‘lsa, yaqinda ish boshlagan Toshkent savdo majmuasining bu yo‘nalish bo‘yicha olgan daromadi so‘nggi uch oyning o‘zida 53 milliard so‘mga yetgan — 2018-yil oxiriga qadar olinadigan foyda 212 mililard so‘mga yetishi prognoz qilinmoqda
2018-yilda savdo majmuasida faoliyat olib borayotgan tadbirkorlar soni yana 275 ga oshib, jami 2535 nafarni tashkil etmoqda.
2016—2017-yillar davomida “Abu Saxiy” savdo majmuasida ko‘rsatilgan xizmatlardan olingan 439 milliard so‘m mablag‘ davlat foydasiga tushmay, aksincha, chetga chiqib ketgan.
Joriy yilning o‘tgan ikki oyi davomida eksport natijasida Toshkent savdo majmuasi tomonidan davlat budjetiga 17 million AQSh dollaridan ortiq mablag‘ tushirildi. 2018-yilning yakuniga borib, bu ko‘rsatkich 80 million dollarga yetishi prognoz qilinmoqda.
Izoh (0)