Farg‘ona viloyati hokimligi va O‘zbekistonning Janubiy Koreyadagi elchixonasi bilan birgalikda 2018-yilda investitsiyalar jalb qilish, eksportni ko‘paytirish va turizm sohasini yanada rivojlantirish yuzasidan tasdiqlangan yo‘l xaritasiga asosan Farg‘ona viloyatiga Janubiy Koreyadan yuzdan ziyod tadbirkorlar, yirik kompaniya, korporatsiya, o‘quv yurtlari va ishlab chiqarish korxonalarining rahbarlari tashrif buyurdi. Bu haqda “Daryo” muxbiri Muhammadjon Obidov xabar bermoqda.
Ular Farg‘ona viloyatida o‘zaro manfaatli korxonalar tashkil etish hamda Janubiy Koreyaga farg‘onalik tadbirkorlar delegatsiyasining tajriba o‘rganish maqsadida tashrif buyurishi kabi masalalarni muhokama etmoqda.
Koreya Respublikasi Evergreen Motors Group kompaniya raisi Kim Chang Kyon (Edvard) boshchiligida biznes-delegatsiya vakillariga biznes forum doirasida viloyatning investitsion salohiyati, yaratilgan imtiyozlar va imkoniyatlar hamda Farg‘ona to‘g‘risida ma’lumotlar berildi.
“Viloyat iqtisodiyotiga kiritilayotgan xorijiy investitsiyalar hajmida Koreya davlati salmoqli o‘rin tutadi. Xususan, 2017-yilning o‘tgan davrida Farg‘ona viloyati xo‘jalik yurituvchi subyektlarining Koreya Respublikasi bilan tashqi savdo aylanmasi hajmi 79 million AQSh dollarini, shundan, eksport 37,4 million, import 41,7 million AQSh dollarini tashkil etdi. Bugungi kunda viloyatda Janubiy Koreya bilan hamkorlikda 18 ta xorijiy investitsiyali korxonalar faoliyat ko‘rsatmoqda”, — deydi Farg‘ona viloyat hokimi Shuhrat G‘aniyev.
Farg‘ona viloyati Koreya Respublikasi ishbilarmonlari biznes forumida jahon miqyosida tilga tushgan Hyundai, KIA, Daewoo kabi korporatsiyalar, Cheonnam National University Hospital tibbiyot markazi, Seojeong University oliy ta’lim maskani, KDB bank muassasasi, Hankook Suward CO., LTD santexnika mahsulotlari ishlab chiqarish zavodi o‘rtasida kelgusida qo‘shma korxonalar tashkil etish, ta’lim, tibbiyotda hamkorlik qilish haqida shartnomalar imzolandi.
“Eng quvonchli natijalardan biri bu dunyoga mashhur koreys Hyundai ekskavatorlarini Qo‘qon iqtisodiy zonasi hududida ishlab chiqaruvchi qo‘shma korxona haqidagi kelishuv bo‘ldi. Shuningdek, ayni daqiqalarda Farg‘ona City’ni koreys kompaniyalar ishtirokida bunyod etish, isitish qurilmalari ishlab chiqarish qo‘shma korxonasini ta’sis etish, 5 ta xorijiy til va kasb o‘rgatish o‘quv markazini ochish, qo‘shma mehnat migratsiyasi markazi tashkil etib, farg‘onalik yoshlarni to‘g‘ridan to‘g‘ri Janubiy Koreyada kafolatli ish o‘rinlari bilan ta’minlash va yana o‘nlab yo‘nalishlardagi masalalar muhokama etilmoqda”, — deydi O‘zbekiston investitsiya davlat qo‘mitasi Farg‘ona viloyat boshqarmasi boshlig‘i Doniyor G‘aniyev.
Izoh (0)