Rossiya O‘zbekistonga sinov tarzida neft yetkazib berishni to‘xtatdi

Rossiya O‘zbekistonga 2018-yil davomida 24,9 ming tonna neft yetkazib berdi. Bu haqda Spot xabar berdi.

Mazkur ko‘rsatkichning bari yanvar oyiga taalluqli. Fevralda neft yetkazib berilmagan.

2017-yilda Rossiyaning O‘zbekistonga neft eksporti 68,2 ming tonnani tashkil etdi. Jumladan, noyabrda 30 ming, dekabrda esa 38,2 ming tonna xomashyo yetkazib berildi. “Transneft” rasmiy vakili Igor Demin gap hozircha sinov tariqasidagi yetkazib berish haqida ketayotganligini bildirgandi.

“Transneft” vitse-prezidenti Sergey Andronov 26-fevral kuni hozirda Qozog‘istondagi sheriklar va O‘zbekiston o‘rtasida neft transportirovkasi hajmini aniqlash yuzasidan muzokaralar ketayotganligini ma’lum qildi.

Rossiya va O‘zbekiston o‘rtasida o‘tgan yil aprelida imzolangan memorandumda mamlakatga 500 ming tonna neft yetkazib berilishi ko‘zda tutilgan edi.