O‘zbekiston amaliy san’at va hunarmandlik tarixi davlat muzeyida kulol G‘ayrat Jo‘rayevning “Ajdodlar merosi davomchilari” nomli ko‘rgazmasi ochildi, deb xabar berdi O‘zA.
G‘ayrat Jo‘rayev Buxoro viloyatining G‘ijduvon tumanida tug‘ilgan. Yosh kulol ko‘plab milliy va xalqaro ko‘rik-tanlovlar va ko‘rgazmalarda ishtirok etib, bir nechta medal va diplomlar bilan taqdirlangan.
Ko‘rgazmada yosh ijodkorning ellikka yaqin asari namoyish etilmoqda. “O‘yma naqsh”, “Buyuk ipak yo‘li”, “Yurakdagi Buxoro”, “Ajdar”, “Yetti go‘zalning biri”, “Hayot daraxti”, “Tandir sotayotgan bobo” hamda “Temuriyzoda” kabi panno, ko‘za, lagan va haykalchalar shular jumlasidan.
Shuningdek, tadbir doirasida G‘ayrat Jo‘rayev tomonidan mahorat darslari o‘tkazildi. Pavel Benkov nomidagi Respublika rassomlik kolleji o‘quvchilari liboslar, Toshkent davlat milliy raqs va xoreografiya oliy maktabi hamda Toshkent davlat san’at va madaniyat instituti talabalari konsert dasturini namoyish qildi.