“Paxta xomashyosi va boshoqli don yetishtirishni moliyalashtirish tizimini tubdan takomillashtirish chora-tadbirlari to‘g‘risida”gi Prezident qarori qabul qilindi. Bu haqda Adliya vazirligining Telegram’dagi “Huquqiy axborot” kanali orqali ma’lum qilindi.
Qarorga asosan:
- 2018-yil 1-martdan boshlab ishlab chiqaruvchilarning rentabelligi oshishini va yuqori sifatli mahsulotlar yetishtirishni rag‘batlantirishni ta’minlaydigan navlar va klasslar bo‘yicha paxta xomashyosi va boshoqli don xaridi yuzasidan kafolatlangan davlat narxlari belgilanadi;
- tuproq unumdorligi past va hosildorlik gektariga 15 sentnerdan past bo‘lgan yerlarda oxirgi 3 yil mobaynida paxta xomashyosiga davlat buyurtmasi joylashtirilmaydi.
- endilikda paxta xomashyosi va boshoqli don uchun uzil-kesil hisob-kitoblar hosil yig‘ishtiriladigan yilning oxirigacha to‘liq hajmda amalga oshirilishi shart.
- Qishloq xo‘jaligi mahsulotlarining davlat xaridi va qishloq xo‘jaligini texnika bilan jihozlashni maqsadli moliyalashtirish jamg‘armasi Qishloq xo‘jaligini davlat tomonidan qo‘llab-quvvatlash jamg‘armasiga aylantirilib, u Moliya vazirligi tasarrufiga o‘tkazilmoqda.
- qishloq xo‘jaligi mahsulotlari yetishtiruvchilarga mineral o‘g‘itlar sotuvchi korxonalar uchun 2019-yil 1-yanvargacha bo‘lgan muddatda yagona soliq to‘lovi stavkasi 2 foiz miqdorda belgilandi.
- chetdan olib kelinadigan fosforli o‘g‘itlar, shuningdek, fosforli o‘g‘itlar ishlab chiqarish uchun olib kelinadigan fosforit xomashyosi 2021-yil 1-yanvargacha bo‘lgan muddatda bojxona to‘lovlaridan ozod qilindi.
- paxta xomashyosi va boshoqli don yetishtiruvchi fermer xo‘jaliklarining xizmat ko‘rsatuvchi tashkilotlar oldidagi 2018-yil 1-yanvar holatidagi qarzdorligi 3 yil muddatga uzaytirildi.