O‘zbekistonning Xitoydagi elchisi Baxtiyor Saidov Chunsin shahrida Jontia Group kompaniyasining ekologik toza energetika sohasidagi investitsion loyihasi bo‘yicha muzokaralarda ishtirok etdi. Bu haqda “Sinxua” xabar berdi.
O‘tgan yil noyabrida O‘zbekiston energiya tejash milliy kompaniyasi va Jontia Group hamkorlik to‘g‘risida memorandum imzolagandi. Hujjatda tomonlar Ohangaronda “Yashil shahar” loyihasini birgalikda amalga oshirishi ko‘zda tutilgandi.
Qiymati 87,44 million dollar bo‘lgan loyiha Ohangaronda issiqlik va elektr energiya ishlab chiqaruvchi yuqori samarali 5 ta stansiya qurilishini ko‘zda tutadi. Mazkur stansiyalarda umumiy quvvati 59 megavatt bo‘lgan elektr generatorlari o‘rnatiladi.
Ular taxminan 2,58 million kvadrat metr maydondagi uy-joy, ofis binolari, maktablar, kasalxonalar va sanoat parklariga xizmat ko‘rsatadi.
Izoh (0)