O‘zbekiston Prezidenti Shavkat Mirziyoyev 27-fevral kuni eksport va import masalalariga bag‘ishlangan videoselektor yig‘ilishida soha bo‘yicha mutasaddi tashkilotlar, mas’ullar faqat quruq hisobot cheklanayotgani, ba’zan bu hisobotlar ochib ham ko‘rilmayotganini tanqid qildi. Yig‘ilishdan reportaj 27-fevral kuni “O‘zbekiston 24” telekanalining “Axborot 24” dasturida namoyish etildi.
Mana, ikki oy o‘tyapti, lekin “ertaga iqtisodiyot nima bo‘larkin?” degan savolga javob yo‘q.Na Vazirlar Mahkamasi, na Tashqi savdo vazirligi, na Iqtisodiyot vazirligi yoki Davlat bojxona qo‘mitasi respublikaga kirib kelayotgan mahsulotlarning importini tahlil qilmagani, qaysi mahsulot qancha miqdorda va qanday narxlarda olib kelinayotganini o‘rganish uyoqda tursin, hatto bu haqda o‘ylab ko‘rmagani haqiqat va bu menga noma’qul narsa.
Joylarda qaysi hokim va sohaga mutassaddi rahbarlar o‘z hududiga kirib kelayotgan yoki korxonalar import qilayotgan mahsulot bilan qiziqyapti? Hech kim. Bu holda ertaga iqtisodiyotimiz nima bo‘ladi? Nima uchun Navoiy viloyati hokimi, NKMK yoki Navoiyazot korxonasi chetdan kirib kelayotgan import hajmini bilmaydi yoki qiziqmaydi?
Umuman, eksport va import masalalari bilan shug‘ullanishda faqat oy yoki chorak tugaganidan keyin nomiga hisobot berish bilan cheklanib qolingan. Bu hisobotlarni tahlil qilish yoki tegishli choralar ko‘rish uyoqda tursin, ochib ham o‘qilmagan, bu sohada nazorat butunlay o‘z holiga tashlab qo‘yilgan, desak bu ham to‘g‘ri.
Hukumatning qaysi kompleksi yoki idorasi import va eksport hajmiga ta’sir etayotgan omillarni tahlil qilyapti? Afsuski, hech kim bu masala bilan shug‘ullanmayapti.
Shavkat Mirziyoyev, O‘zbekiston Prezidenti
Izoh (0)