O‘zbekistondagi yo‘l belgilariga mas’ul “O‘zavtoyo‘lbelgi” davlat unitar korxonasi tomonidan joriy yil Qoraqalpog‘iston Respublikasida 1451 yo‘l belgisi, Nukus shahrida o‘nta yangi svetofor, yo‘llarning kesishmalarida beshta videonazorat kameralari o‘rnatilishi rejalashtirilgan. Bu haqda O‘zA xabar bermoqda.
Qoraqalpog‘iston Respublikasi Yo‘l harakati xavfsizligi boshqarmasi ushbu kameralar yo‘l-patrul xizmati inspektorlari faoliyatini ancha yengillashtirishiga ishonch bildirmoqda.
Mart oyidan boshlab Nukus shahrida beshta joyda — Qoraqalpog‘iston va Q. Rejepov, Ernazar Alako‘z va Mateke Jumanazarov, Ollayor Dosnazarov va Mateke Jumanazarov, Beruniy va Ollayor Dosnazarov, O‘zbekiston shohko‘chasi bilan Beruniy ko‘chalarining yo‘l kesishmalariga videonazorat kameralari o‘rnatiladi.
Bu videonazorat kameralari yo‘l-transport hodisalarining yuz berish holatlari kamayishiga va oldi olinishiga xizmat qiladi.
2022-yilgacha Nukus shahrining deyarli barcha yo‘l kesishmalariga jami 44 videonazorat kameralari o‘rnatiladi.
Izoh (0)