Toshkent shahridagi Qurolli Kuchlar davlat muzeyida 24-fevral kuni 73 yoshida vafot etgan nafaqadagi general-mayor Ismoil Ergashev bilan vidolashuv marosimi bo‘lib o‘tdi. Bu haqda “Daryo”ga Mudofaa vazirligi matbuot xizmati xabar berdi.
Motam marosimida keng jamoatchilik, vazirlik va idoralar vakillari, harbiy xizmatchilar, Qurolli Kuchlar faxriylari, Mudofaa vazirligi huzuridagi Jamoatchilik kengashi a’zolari ishtirok etdi.
I. Ergashev 1945-yil 5-avgustda Samarqand viloyatining Chelak shahrida tug‘ilgan. U 1992—94-yillarda Mudofaa vazirligi artilleriya boshqarmasi boshlig‘i, 1994—97-yillarda Mudofaa vazirligi artilleriya boshqarmasi boshlig‘i – artilleriya qo‘mondoni, 1997—99- yillarda Mudofaa vazirining front orti ta’minoti va kapital qurilish bo‘yicha o‘rinbosari, 1998—2000-yillarda Mudofaa vazirining jangovar tayyorgarlik bo‘yicha o‘rinbosari, 2000—2004-yillarda Markaziy harbiy okrug qo‘shinlari qo‘mondoni, 2004—2005-yillarda Mudofaa vazirining birinchi o‘rinbosari – Qurolli Kuchlar Birlashgan shtabi boshlig‘i lavozimlarida faoliyat yuritgan.
Uning el-yurt tinchligi yo‘lidagi fidokorona xizmatlari munosib e’tirof etilgan. General-mayor I. Ergashev mamlakatning bir qancha davlat mukofotlari, jumladan, I va II darajali “Shon-sharaf” hamda “Jaloliddin Manguberdi” ordenlari bilan taqdirlangan.
I. Ergashev o‘zi tug‘ilib-o‘sgan Chelak shahridagi qabristonda dafn etiladi.
Izoh (0)