Futbol bo‘yicha Yevropa Ligasining 1/16 finalidan joy olgan Ispaniyaning “Atletik” va Rossiyaning “Spartak” jamoalari o‘rtasidagi bellashuvdan keyin katta janjal kelib chiqdi.
Uchrashuvda Moskva klubi 2:1 hisobida zafar quchdi. Biroq ispaniyaliklar Rossiyadan 3:1 hisobidagi g‘alaba bilan qaytgani uchun, “Atletik” navbatdagi bosqichga yo‘l oldi. Uchrashuv so‘ngida esa kutilganidek rossiyalik fanatlar o‘zini bosib tura olmadi. 800 nafardan ziyod futbol muxlisi Bilbao ko‘chalarida marsh uyushtirdi va ularni nazorat qilishning imkoni bo‘lmay qoldi.
Ishga politsiya aralashdi. Ispan nashrlari bergan ma’lumotga ko‘ra, politsiya vakili o‘zaro to‘qnashuvlar natijasidan yurak huruji sabab vafot etgan. Shisha idishlar va qattiq jismlarning uloqtirilishi sabab kamida 5 kishi jiddiy shikastlangan va shifoxonaga olib ketilgan. Ularning uch nafari “Spartak” fanatlari ekani ma’lum qilingan.
“Spartak” bosh murabbiyi Massimo Karreraning tarjimoni Artyom Fetisov ham bundan jabr ko‘rdi. U o‘zining Instgram sahifasiga bo‘ynini suratga olib joyladi. Bunda noma’lum kimsa uning bo‘yniga temir kamar bilan zarba berganini ko‘rish mumkin edi.
Rossiya tashqi ishlar vazirligi Ispaniyaga yo‘l olayotgan muxlislarni ehtiyotkor bo‘lishga chaqirgan bo‘lsa-da, ular bunga amal qilmagan. “Spartak” mag‘lub bo‘lgach, fanatlardan iborat uyushgan guruh “Atletik” muxlislarini izlab, ko‘chalarda tentirashni boshlagan.
Politsiya hozircha 5 kishini hibsga olib ulgurgan. Undan tashqari, UEFA ham mazkur ish yuzasidan surishtiruv ishlarini boshladi. Voqealar rivoji jiddiy tus olishi katta ehtimol.
O‘yingacha ispaniyaliklar ham ehtiyot choralarini ko‘rib qo‘ygani uchun, yetkazilgan zarar nisbatan ozroq. Rossiyalik futbol muxlislarining xulqidan xavotirga tushgan Bilbao ma’muriyati maktablarda qo‘shimcha darslarni bekor qilgan, bar va restoranlarning ko‘chalarga joylashtirilgan stol-stullarini ichkariga kiritishni maslahat bergandi.
https://www.youtube.com/watch?v=h05VrQfhWtk
https://www.youtube.com/watch?v=R4VImPyJ2QQ
https://www.youtube.com/watch?v=kxIa34ArcpY
https://www.youtube.com/watch?v=x4rInfbpKMo
https://www.youtube.com/watch?v=rhbZqd7uZww
Izoh (0)