Argentinalik havaskor astronom Viktor Buzo tarixda birinchi marta supernovaning tug‘ilish vaqtini suratga tushirishga muvaffaq bo‘ldi, deb yozadi “Kommersant”. Chaqnashni Viktor Buzo tasodifan — teleskop uchun yangi kamerani sinash chog‘ida kadrga muhrlagan.

Foto: “Gazeta.ru”

2016-yilning sentabrida havaskor astronom Yerdan 80 million yorug‘lik yili masofasida joylashgan Haykaltarosh yulduzlar turkumidagi NGC 613 spiral galaktikasini ketma-ket bir necha marta suratga olgan. Keyinroq fotosuratlardan birida argentinalik chaqnashni payqagan va professionallarga murojaat qilgan.

Supernovaning chaqnashini oldindan bilib bo‘lmaganligi tufayli, olimlar u haqda bir necha kun, oy yoki yilga farqlanadigan osmon hududlari suratlarini taqqoslash chog‘ida bilib qoladi.

Supernova — yulduzning hayoti so‘ngida portlashi jarayoni. Portlash chog‘ida katta miqdorda energiya ajralib chiqadi, yorug‘lik darajasi esa milliardlab marta oshib ketadi.