Tashkent City loyihasining suratlari taqdim etildi (foto)

Alisher Navoiy, Olmazor, Islom Karimov va Furqat ko‘chalari oralig‘ida bunyod etilayotgan Tashkent City xalqaro ishbilarmonlik markazining taqdimoti bo‘lib o‘tdi, deb xabar berdi “Novosti Uzbekistana”.

Mazkur kompleks 80 gektar maydonni egallaydi. Qurilish ishlari Germaniyaning Dress & Sommer xalqaro konsalting kompaniyasi bilan hamkorlikda olib boriladi.

Tashkent City hududining 395 000 kvadrat metrini turar joy binolari, 281 000 kvadrat metrini — ofislar, 349 000 — savdo nuqtalari, 64 000 kvadrat metrini esa mehmonxonalar egallaydi. Anjumanlar zali va ko‘rgazma binolariga 36 000 kvadrat metr, ta’lim muassasalariga 9 000 kvadrat metr ajratiladi. 33 ming kvadrat metrda dam olish zonalari barpo etiladi.

Tashkent City loyihasiga ko‘ra unda joylashadigan binolar:

— Yer osti avtoturargohlariga ega to‘qqizta “A” klassiga oid turar joy binosi;

— Bolalar bog‘chasi, xalqaro maktab va sog‘lomlashtirish markaziga ega “A” sinfiga oid beshta turar joy binosi;

— Ichidan ofislar, kvartiralar, mehmonxona va gipermarketlar o‘rin oladigan 40 qavatli binolar;

— Shuningdek, ofislar, mehmonxona apartamenti va turar joy kvartiralari uchun mo‘ljallangan yana bir 40 qavatli bino;

— Besh yulduzli mehmonxona, kongress-xoll va ko‘rgazma markazi;

— Moliyaviy markaz;

— Savdo markazlari, mini-mehmonxonalar va ofislar o‘rin olgan 11 ta 4 qavatli bino.

Shuningdek, piyodalar zonasi joylashgan markazda savdo markazlari va ko‘ngilochar muassasalar o‘rin oladi.

Umuman olganda Tashkent City o‘zining ekologikligi va zamonaviyligi bilan barchani hayron qoldiradigan bo‘ladi. Biroq loyiha suratlariga qaraganda, bu yerdagi yashil manzaralarning aksariyatini gazonlar va past bo‘yli daraxtlar tashkil etadi. Yo‘llarning asosiy qismi quyosh nuridan himoya qilinmaydi, bu esa yoz fasli issiq keladigan Toshkent uchun foyda emas, albatta.