Suv ta’minoti nazoratchilari funksiyalari Majburiy ijro byurosiga o‘tadi

Suv ta’minoti va kanalizatsiya xizmatlarini ko‘rsatuvchi “Suvoqava” va “Suvsoz” davlat unitar korxonalari 2852 ta kontrolyorlar shtat birligini qisqartiradi. O‘zbekiston Bosh prokuraturasi huzuridagi Majburiy ijro byurosi shtati esa shuncha miqdorga (1262 davlat inspektori, 939 davlat ijrochisi va 651 boshqa ishchi) ko‘payadi. Bu Prezidentning “Qabul qilinayotgan normativ-huquqiy hujjatlar ijrosini ta’minlashda prokuratura organlari faoliyatining samaradorligini oshirish chora-tadbirlari to‘g‘risida”gi farmonida ko‘zda tutilgan, deb yozadi “Gazeta.uz”.

Farmonga muvofiq, 1-martdan turar-joy obyekti manzili bo‘yicha ro‘yxatga kiritilgan voyaga yetgan fuqarolarning barchasi energiya resurslari hamda suv ta’minoti va kanalizatsiya bo‘yicha ko‘rsatilgan xizmatlar uchun to‘lash majburiyati bo‘yicha mas’ul bo‘ladi. Bu energiya resurslarini yetkazib berish hamda suv ta’minoti va kanalizatsiya xizmatlarini ko‘rsatish bo‘yicha yangilangan shartnomalarga kiritib qo‘yiladi.

Byuroga, shuningdek, iste’molchilarga yetkazib berilgan energiya resurslaridan qarzdorlikni yopish uchun har oyda iste’molchilarning plastik kartalariga xizmat ko‘rsatiladigan bank hisobvaraqlaridan eng kam oylik ish haqining ikki barobaridan oshmaydigan summani tortishuvga o‘rin qoldirmaydigan tarzda yechib olish huquqi berildi.