Prezident Shavkat Mirziyoyev Buxoro shahrining tarixiy qismida turizm sohasini yanada rivojlantirish konsepsiyasi asosida amalga oshirilayotgan ishlar bilan tanishdi. Bu haqda Prezident matbuot xizmati xabar bermoqda.
Davlat rahbari viloyatga o‘tgan yilgi tashrifi chog‘ida viloyatning ulkan turistik salohiyatidan to‘la foydalanish, shaharning tarixiy qismida hunarmandlar mavzesi qurish, Poyi Kalon va Mir Arab madrasalarini qayta ta’mirlash kabi qator masalalarni belgilab bergan edi.
Ushbu ko‘rsatmalar asosida Poyi Kalon va Mir Arab madrasalari ta’mirdan chiqarildi. Haqiqat ko‘chasida birinchi qavatida do‘kon va ustaxonalar bo‘lgan, ikkinchi qavatida hunarmandlar oilasi yashaydigan uylar qurilib, atrof obodonlashtirildi. Natijada ko‘cha va saylgoh shaharning tarixiy qismiga monand zamonaviy qiyofa kasb etdi.
Bu boradagi ishlar izchillik bilan davom ettirilmoqda. Mehmonxonalar, savdo-ko‘ngilochar maskanlar, kafe va choyxonalar qurilmoqda.
Prezident jahon tajribasi asosida sayyohlarga barcha qulayliklarni yaratish, ularning xavfsizligini ta’minlash, ko‘ngilochar dasturlar yaratish bo‘yicha ko‘rsatmalar berdi.
Davlat rahbari shaharning tarixiy qismidagi madaniy meros obyektlarini ta’mirlash va tiklash, hududdan o‘tgan avtomobil yo‘llari va muhandislik-kommunikatsiya tarmoqlarini rekonstruksiya qilish kabi loyihalar bilan tanishdi.
Izoh (0)