O‘zbekiston Prezidenti Shavkat Mirziyoyevning 19-yanvar kuni Surxondaryo viloyati Qiziriq tumanida o‘tgan yig‘ilishdagi nutqining yangi audioparchasi ijtimoiy tarmoqlar va messenjerlarda tarqaldi. “Kun.uz” to‘rt yarim daqiqalik yangi audiodagi Prezident so‘zlarini matn ko‘rinishida e’lon qildi.
Unda Shavkat Mirziyoyev Milliy xavfsizlik xizmatining avvalgi rahbariyati tarkibida bo‘lgan shaxslarni, xizmatning sobiq yuqori martabali vakillarini ayovsiz tanqid qilganiga guvoh bo‘lish mumkin. Xususan, Prezident o‘z nutqi davomida xizmatning bir necha amaldorlarini sotqinlikda ayblagan.
Avvalroq internetda o‘sha yig‘ilishdagi Prezident nutqining MXX faoliyatiga bag‘ishlangan birinchi qismi paydo bo‘lgan, unda Shavkat Mirziyoyev MXX raisining sobiq o‘rinbosari Shuhrat G‘ulomovni “sotqin” deb atagan edi. Yangi audioda G‘ulomovning “vatanga xiyonatchiligi uchun bir umrga qamalgani” ma’lum qilingan.Bugun Boysun MXX rahbari mayor Sunnatullo Eshquvvatovni ishdan oldirdim. Negaki, bular o‘z o‘rnini bilmadi, o‘z ishini qilmadi. Milliy xavfsizlikdagilar Surxondaryoni o‘ldirgan. Ikki-uch sotqin, davlat sotqinlari ishlagan. Hammasidan xabarim bor. Angor tumanidagi boshliq Bahrom Abdumo‘minov, tergov bo‘limi boshlig‘i kapitan Berdimuhammedov ham ishdan olindi. Bular Surxondaryoni ot o‘yin qilib tashlagan. Hamma tizimni egallagan, hamma tashkilotni egallagan. Yana bir-ikkitasi Toshkentda yuribdi, borib ishdan olaman. Polkovnik Haydarov ham sotqin. Uniyam, boshqalariniyam ishdan oldim...Eslatib o‘tamiz, Prezident ushbu nutqni 2018-yil 19-yanvar kuni o‘qilgan. 31-yanvar kuni Milliy xavfsizlik xizmati raisi o‘zgardi — tashkilotga 1995-yildan beri rahbarlik qilib kelayotgan Rustam Inoyatov o‘rnini shu vaqtgacha bosh prokuror lavozimida ishlab kelgan Ixtiyor Abdullayev egalladi. MXXdan ketgan Rustam Inoyatov Prezident davlat maslahatchisi va senator etib tayinlandi.Endi hammang (MXXning joylardagi rahbarlari) majlisga kelib o‘tirasan. Tumandagi majlisgayam. Oyog‘ing yerdan uzilmasdan, majlisda o‘tirasan. Yo‘qsa, menga bunday xizmat kerakmas. Shu paytgacha poraxo‘rlik qilib, hammayoqni sharmanda qilib keldinglar. Tushunarlimi, yo‘qmi?.. MXXning generallarini, uchta rais o‘rinbosarlarini ishdan olib tashladim. Surxondaryoda ishlab ketgani bor edi, Toshpo‘latov g‘irt o‘g‘ri edi...
Men bu yerga xalqqa halol xizmat qilish uchun kelganman. Bu noinsoflarni bilaman, yerga qarab yuribdi. Hali hammasi joy-joyiga tushadi. Shuni bilinglar. Hokim, hokimiyatdagi to‘rtlik mening vakilim. Qo‘rqmanglar. U zamon tugadi. Ularga otasidan qolgan vakolat yo‘q. Hech kimmas bular. Bularning qo‘lidan kabinetda o‘tirib, g‘o‘ddayishdan boshqasi kelmaydi. Bularning g‘o‘ddayishi davlatga og‘ir tushdi. MXXda yana bitta g‘o‘ddaygani bor edi. Vatan xiyonatchisi bo‘lib, hozir umrbod qamaldi. G‘ulomov degan noinsof. Uning ildizlari bor haliyam. Toshkentda o‘rgandim, bugun kelib odamlarini ishdan oldim. Endi har bittasini o‘zim ishga tayinlayman.
Bizga Milliy xavfsizlik xizmati kerak. Adolatli va halol odamlar kerak, bizga hokimni poylaydigan, davlatning boshqa odamlarini kuzatadiganlar kerak emas. Bo‘ldi, u zamonlar tugadi. Eplay olmasa, vallomatini ham ishdan olaman. Shuni bilinglar. Davlat davlatligini qiladi. Avvalgi rahbarlar ularga shunday vakolatlar bergan bo‘lsa, unaqa rahbarlar endi yo‘q. Xalq menga ishondimi, bu ishonchni oqlayman.
Shavkat Mirziyoyev, O‘zbekiston Prezidenti
Izoh (0)