Va nihoyat o‘sha kun keldi va o‘zbekistonlik hujumchi Igor Sergeyev BAA chempionatidagi debyut golini urdi, deb yozdi “Championat.asia” nashri.

Foto: “Championat.asia”

Ilk gol uchun Sergeyevga 4 ta o‘yin kerak bo‘ldi. “Dibba Al-Fujayrah” klubini qabul qilgan “Al-Dafra” ishonchli g‘alabaga erishdi. Bellashuvning 92-daqiqasida Sergeyev o‘z goli bilan jamoasining ochko yo‘qotishi masalasini kun tartibidan olib tashlagan. Bungacha u 3 ta o‘yinda ishtirok etib, gol urishning uddasidan chiqa olmagandi.

Aziz Haydarov hamda Otabek Shukurov jamoalari bugun — 9 fevral kuni 16-turni o‘tkazadi. “Ajman” o‘z uyida kuchli to‘rtlikni yakunlab turgan “An-Nasr”ni qabul qiladi. “Sharja” esa safarda “Shabab Al-Ahli”ga qarshi kurash olib boradi. Bir tur avval o‘zbekistonlik legionerlar to‘p suradigan barcha klublar mag‘lubiyat alamini totib ko‘rgandi. 16-turda shuning aksi kuzatilishi ham mumkin.

Qayd etish kerak, Amirlik chempionatidagi to‘rtinchi o‘zbekistonlik legioner Sardor Rashidov Toshkentning “Lokomotiv” klubi bilan shartnoma imzolab, allaqachon “Al-Jazira”ni tark etgan.