Milliy olimpiya qo‘mitasi prezidenti Umid Ahmadjonov 9-fevral kuni qishki Olimpiadaning ochilish marosimida ishtirok etadi. Mazkur tadbirda ishtirok qatnashish maqsadida Ahmadjonov Janubiy Koreyaning Pxyonchxan shahriga yetib keldi.

Foto: Google Images

Qishki Olimpiadada O‘zbekiston sharafini ikki nafar sportchi himoya qiladi. Yaqindagina delegatsiyani Pxyonchxanga jo‘natish oldidan tadbir o‘lkazilgandi. Kecha — 6-fevral kuni futbol bo‘yicha jahon kubogining taqdimot marosimida ishtirok etgan MOQ prezidenti, shu kunning o‘zidayoq qishki Olimpiada delegatsiyasi bilan birga yo‘lga chiqqan. Misha Ge 10-fevraldan so‘ng Janubiy Koreyaga AQSh orqali yetib keladi.

MOQ matbuot xizmatining ma’lum qilishicha, ertaga — 8-fevral kuni Pxyonchxandagi olimpiya shaharchasida O‘zbekiston bayrog‘ini ko‘tarish marosimi o‘tkaziladi. Ahmadjonov unda ham bevosita ishtirok etadi.

O‘FA hamda MOQdagi qator yumushlari borligi sabab Ahmadjonov 13-fevralga qadar Toshkentga qaytib kelishni rejalashtirgan.