LG G5 modeli muvaffaqiyatsizlikka uchragach, Janubiy koreyalik ixtirochilar o‘z aybini to‘g‘irlab, G6 modelini taqdim etgan edi. Deyarli hoshiyasiz ekran va ajoyib kamerasi sababli mazkur modelga ko‘plab jurnalistlar tomonidan ijobiy baho berilgandi, deb xabar berdi Hi-Tech.Mail.Ru.

Foto: Hi-Tech.Mail.Ru

Internet tarmog‘ida tarqalgan ma’lumotlarga ko‘ra, kompaniyaning yangi smartfoni o‘zidan oldingilarga nisbatan ancha hoshiyasiz bo‘ladi. Qora chiziq qurilmaning frontal kamera joylashgan qismidagina qoladi. Shu bilan birga tomonlar nisbati — 18:9 saqlanib qolinadi. Shuningdek, smartfonning orqa tomonidan barmoq izi skaneri va ikkita kamera o‘rin olishi ma’lum.

Ta’kidlanishicha, G7 sakkiz yadroli Qualcomm Snapdragon 845 protsessori va 6 gigabayt tezkor xotira bilan jihozlanadi. Bundan tashqari qurilma Quick Charge 4.0 tezkor quvvatlantirish texnologiyasiga ham ega bo‘ladi.

Hozirda G7’ning taqdim etilish sanasi noma’lum. Tahlilchilar avvaliga ushbu model fevral oyida bo‘lib o‘tadigan Mobile World Congress 2018 ko‘rgazmasidan namoyish etilishini taxmin qilgandi, biroq LG rahbariyati ayrim sabablari ko‘ra, muddatni o‘zgartirishga majbur bo‘ldi.