Jizzaxlik o‘t o‘chiruvchilar yonayotgan xonadon ichidan 19 yoshli qizni qutqarib qoldi

31-yanvar kuni soat 12:27 da Jizzax viloyati IIB Yong‘in xavfsizligi boshqarmasi markaziy dispetcherlik xizmatiga yong‘in haqida xabar kelib tushdi, deb xabar beradi viloyat IIB matbuot xizmati.

Shundan so‘ng yong‘in joyiga Jizzax shahar Yong‘in xavfsizligi bo‘limi 1-harbiylashtirilgan yong‘in xavfsizligi qismining 2 ta bo‘linmasi yuborildi.

“Yong‘in yuz bergan Jizzax shahar A.Navoiy mahallasi “Abdujabborov” ko‘chasi 2-uy darvozasi qulflangan edi. Smena boshlig‘i leytenant Shoir Fayziyev xolis guvohlar ishtirokida darvozani ochishga ko‘rsatma berdi. O‘t o‘chiruvchilar tutun bilan qoplangan xonaga kirganida shu uyda yashovchi 1999-yilda tug‘ilgan fuqaro D.Husanova hushsiz yotgan edi. Kichik serjant Husniddin G‘apporov va safdor Adham Jo‘rayevlar tezda qizni tashqariga olib chiqdi. O‘z vaqtida tibbiy yordam ko‘rsatilishi oqibatida qizning hayoti saqlab qolindi”, — deyiladi xabarda.

Qayd etilishicha, brigada qisqa muddatda yong‘inni bartaraf etgan. Yong‘in natijasida xonadonning 25 kvadrat metr maydoni va uy jihozlari zarar ko‘rgan.