Maqsuda Qoraxo‘jayeva 2000-yilda Yangiyo‘l tumani, Gulbahor qo‘rg‘oni, Sh.Rashidov ko‘chasida joylashgan 2-A uy, 38-xonadonni sotib oldi. Uyni olgan Qoraxo‘jayevalar oilasi bugungi kunga qadar kommunal to‘lovlarni o‘z vaqtida to‘lab kelgan.
Qoraxo‘jayevalarning muammosi shunda ediki, ular olgan xonadon o‘sha vaqtda Yangiyo‘l tumanidagi “Mustaqil O‘zbekistonning 5 yilligi” nomidagi paxta tozalash korxonasi balansida bo‘lgan. 2006-yilda esa korxona mazkur uyni balansidan chiqargan. Shundan so‘ng, yuqorida tilga olingan 2-A uyda istiqomat qilayotgan oilalarning ko‘pchiligi o‘ziga tegishli bo‘lgan xonadonlarni o‘z nomlariga rasmiylashtirib olgan. Maqsuda Qoraxo‘jayeva ham o‘zi yashab kelayotgan uyni o‘z nomiga rasmiylashtirish uchun bundan roppa-rosa besh yil oldin Yangiyo‘l tuman hokimligiga kerakli hujjatlarni topshirdi, deb yozadi “Inson va qonun” nashri.
O‘shanda hujjatlarni o‘rganib chiqqan hokimiyat mas’ullari Qoraxo‘jayevaga sizga tegishli bo‘lgan uy tuman paxta tozalash korxonasi balansida ekan, o‘sha yerga borsangiz ishingiz hal bo‘ladi, degan javobni beradi. Shundan so‘ng, Qoraxo‘jayevalarning idorama-idora, tashkilotma-tashkilot sarson-sargardon yurishi boshlanadi. Qisqasi, M.Qoraxo‘jayeva hokimlikning ko‘rsatmasi bilan paxta tozalash korxonasiga, korxonaning maslahati bilan xususiylashtirish, monopoliyadan chiqarish va raqobatni rivojlantirish davlat qo‘mitasining Toshkent viloyat hududiy boshqarmasiga, boshqarmaning buyrug‘iga asosan...
Xullas, M.Qoraxo‘jayeva ham yuqoridagi ishga mas’ul idora rahbar, xodimlarining maslahat va buyruqlarini bajarishdan “charchamadi”, chunki barcha hujjatlar taxt qilingan. Paxta tozalash korxonasiga to‘lanadigan to‘lovlar amalga oshirilgan. Shu bois ham unda umid bor edi.
Shunday kunlarning birida, 2017-yilning dekabr oyida M.Qoraxo‘jayeva o‘zi istiqomat qilayotgan tumanda Adliya vazirining sayyor qabuli tashkil etilganini eshitib, unga shoshdi. Maqsuda opa Adliya vaziriga ancha yillardan buyon cho‘zilib kelayotgan muammosini aytdi. Adliya vaziri o‘sha joyning o‘zida Toshkent viloyat adliya boshqarmasining mas’ulini chaqirib, hoziroq masalaga oydinlik kiritish talabini qo‘ydi. Adliya boshqarmasidan chiqishi kerak bo‘lgan xat o‘sha kundan uch kun oldin tegishli joyga yuborilganligi aniqlandi.
Sayyor qabulning ertasiga M.Qoraxo‘jayeva xususiylashtirish, monopoliyadan chiqarish va raqobatni rivojlantirish davlat qo‘mitasining Toshkent viloyat hududiy boshqarmasi tomon otlandi. Mazkur hududiy boshqarma adliya boshqarmasi yuborgan xatdan qoniqmaganligini aytib, Maqsuda opani “O‘zpaxtasanoat” AJga borib ulardan ham xat qildirib kelishini aytadi. Bir necha kun deganda mazkur aksiyadorlik jamiyatidan ham xatni olib o‘sha boshqarmaga topshiradi. Hududiy boshqarmaning mas’ullari mazkur xatdan ham qoniqmaganligini aytadi. Oradan yana kunlar o‘tdi.
Dekabr oyining oxirlarida M.Qoraxo‘jayeva yana yuqoridagi hududiy boshqarmaga yo‘l oldi. Boshqarma rahbari unga 15 kun ichida so‘ralayotgan order berilishini ma’lum qildi. Kutishga o‘rgangan M. Qoraxo‘jayeva yana 15 kun kutdi. Shundan so‘ng yana hududiy boshqarmaga bordi. Bu safar uni rahbar o‘rinbosari qabul qildi. O‘rinbosar M. Qoraxo‘jayevaga uning muammosi hal bo‘lmasligi, buning iloji yo‘qligini bildirdi.
M.Qoraxo‘jayeva bir quchoq hujjat bilan qayerga, kimga borishni bilmay boshi qotgan. Axir, murojaat qilmagan idorasi, uchrashmagan mas’ul xodimi-yu rahbari qolmadi-da!
2018-yilning 26-yanvarida tuman hokimi M.Qoraxo‘jayevani qabuliga chaqirdi. U bir hafta ichida bu masalaga oydinlik kiritishini ma’lum qildi. Bugun M. Qoraxo‘jayevada bir hadik bor, ishqilib hokim ham yana o‘sha hududiy boshqarmaga yubormasa bo‘lgani.
Izoh (0)