Xitoyda o‘tkazilgan Osiyo chempionatida g‘olib bo‘lgan O‘zbekiston U-23 terma jamoasi bugun Toshkent vaqti bilan poytaxtga yetib keldi. Islom Karimov nomidagi Toshkent xalqaro aeroportida O‘zbekiston olimpiya terma jamoasi bosh murabbiyi Ravshan Haydarovdan “Xabar.uz” intervyu oldi.

Foto: Getty Images

“Osiyo chempionatida erishilgan tarixiy natija jamoamizning ahilligi, g‘alabaga chanqoqligi tufayli qo‘lga kiritildi. Biz butun terma jamoa a’zolari — murabbiylar shtabi ham, futbolchilar ham bir maqsad yo‘lida harakat qildik. Final uchrashuvida so‘nggi zaxira imkoniyatidan foydalanishdan oldin oldimda ikkita yo‘l bor edi. Bittasi zaxira darvozabonni o‘yinga tushirib, penaltilar seriyasiga tayyorgarlik ko‘rish yoki hujumchini maydonga tushirib, qolgan 2-3 daqiqa ichida gol urish. Men Allohga tavakkal qilib, ikkinchi yo‘lni tanladim va bu qarorim to‘g‘ri bo‘lib chiqdi”, — deydi murabbiy.

“Xabar.uz” muxbirining guruh o‘yinlaridagi sust, ishonchsiz o‘yinlardan futbolchilarning qanday qutulgani, Qozog‘istonning Aqto‘be viloyatida ro‘y bergan fojia olimpiyachilarga qanday ta’sir ko‘rsatdi, ko‘pchilik ana shu voqeadan keyin yigitlar o‘zgardi deya taxmin qilyapti, shu rostmi, degan savoliga quyidagicha javob bergan:

“Ushbu fojia barcha yurtdoshlarimiz kabi bizni ham larzaga soldi. O‘FF prezidenti Umid Ahmadjonov terma jamoaga ayni shu haqda maktub yo‘lladi. Biz bu xatni yigitlarga o‘qib berdik. O‘zim ham kutilmagan fojia oqibatida qurbon bo‘lganlar xotirasi uchun ham keyingi o‘yinlarda g‘alaba qozonishimiz shartligini ularga aytdim. Yigitlar ham ro‘y bergan fojiadan qattiq ta’sirlanishdi, so‘zlarimizning ahamiyatini yurakdan his qilishdi va buni maydonda isbotlashdi”, — deydi Ravshan Haydarov.