Uzbek Tigers. WSB uchun tarkib aniq. Bu yil Shahram G‘iyosov va Murod Ahmadaliyev yo‘q. Hasanboy Do‘stmatov esa safda

10-fevral kuni WSB musobaqasidagi uchinchi ishtirokini boshlaydigan Uzbek Tigers boks jamoasi yangi mavsum uchun tarkibini e’lon qildi.

Avlodlar almashinuvi

Professional ringga qadam qo‘ygan Shahram G‘iyosov, Murod Ahmadaliyev kabi sportchilar endi jamoaga yordam bera olmaydi. Rio—2016 Olimpiadasidan keyin Fazliddin G‘oibnazarov hamda Rustam To‘laganov ham prof ringga o‘tib ketgandi.

Bu aslida yaxshi jarayon. O‘zbekistondan istedodli bokschilar ketma-ket yetishib chiqyapti. Demak, katta arenalarga kuzatilgan bokschilar uchun o‘rinbosarlar bor. WSB musobaqasining bu yilgisida Hasanboy Do‘stmatov, Shahobiddin Zoirov, Isroil Madrimov, Sanjar Tursunov, Bektemir Meliqo‘ziyev va Bahodir Jalolov kabi xalqaro maydonda ancha toblangan sportchilar yoniga, umidli charm qo‘lqop ustalari ham qo‘shildi. Ajab emas, kelasi mavsumdan e’tiboran yuqorida nomlari ko‘rsatilgan sportchilar ham faoliyatini Yevropa yoki Amerikada davom ettirsa. Norasmiy ma’lumotlarga ko‘ra, ularning har biri uchun yaxshi takliflar bor.

Vaznlar tasnifi

WSB musobaqasida klublar 10 ta vazn toifasida raqobatga kirishadi. Janglar uy-safar tizimida o‘tadi. Aytaylik, Uzbek Tigers’ning ilk raqibi turnir yetakchilaridan biri bo‘lgan Cuba Domadores bo‘ladi. Bunda bokschilar С1 va С2 kabi guruhlarga ajratib olinadi. Har bir guruh o‘z ichiga 5 tadan vazn toifasini oladi. Kubada С2 ro‘yxatidagi sportchilar o‘zaro ringga chiqsa, Toshkentdagi javob janglari С1 vakillari o‘rtasida bo‘ladi.

Bu safarga bir emas, 10 nafar bokschini yetaklab yurmaslik uchun imkon beradi. Uy va safardagi 5 tadan — jami 10 ta jangda har bir vazn toifasida raqobatlashishning imkoni bor. Aytaylik, boks klublari uzoq safarlarga katta delegatsiya bilan borishda moliyaviy qiyinchiliklarga duch kelishi tabiiy. Ikki guruhga ajratish bu kabi holatlarda yengillik yaratadi.

С1 o‘z ichiga -49, -56, -64, -75 va -91 kilogramm vazn toifalarini olsa, С2 guruhiga -52, -60, -69, -81 va +91 kilogrammli sportchilar kiradi. O‘z-o‘zidan aniq bo‘ladiki, Hasanboy Do‘stmatov va С1 guruhining qolgan sportchilari Kubaga bormaydi. Ular raqibni Toshkentda kutib oladi. Bahodir Jalolov va С2 vakilarigina Kubada jang qiladi.

Tarkib

O‘z-o‘zidan har bir vazn toifasining asosiy sportchilari bor. Ular jarohat olgudek bo‘lsa, o‘rnida zaxira sportchilari ishtirok etadi. So‘nggi ma’lumotlarga ko‘ra, Bektemir Meliqo‘ziyev hamda Jasur Latipovda jarohat bor. Shundan kelib chiqib, ular Kubaga bora olmaydi va Uzbek Tigers zaxira bokschilardan foydalanadi. Quyida С1 va С2 a’zolari bilan tanishib olish mumkin.

С1

-49 kg: Hasanboy Do‘stmatov (Mironshoh Ibragimov)

-56 kg: Shahobiddin Zoirov (Abdulhay Shorahmatov)

-64 kg: Iqbol Xoldorov (Aliyor Noraliyev)

-75 kg: Isroil Madrimov (Odil Aslanov)

-91 kg: Sanjar Tursunov (Sardor Yormuhamedov)

С2

• -52 kg: Jasur Latipov (Xudoynazar Fayzov)
• -60 kg: Shunqor Abdurasulov (Shukur Rahimov)
• -69 kg: Mahmud G‘oipov (Fazliddin Meliboyev (Bobo Usmon Baturov))
• -81 kg: Bektemir Meliqo‘ziyev (Madiyor Saidrahimov (Zuxriddin Mahkamov))
• +91 kg: Bahodir Jalolov (Laziz Mullajonov)

Personal

• Bosh murabbiy: To‘lqin Qilichev
• Katta murabbiy: Rahmatjon Ro‘ziohunov
• Murabbiylar: Ravshan Xo‘jayev, Rustam Saidov, Ziyatdin Toyganbayev
• Shifokorlar: Dilshod Kazakov va Komil Rasulov
• Jamoa rahbari: Bobur Akbarov