O‘zbekiston Futbol Federatsiyasining 25-yanvar kuni bo‘lib o‘tgan hisobot-saylov konferensiyasida O‘zbekiston bosh vazirining birinchi o‘rinbosari, “O‘zbekiston temir yo‘llari” kompaniyasi rahbari Ochilboy Ramatov tashkilotning yangi prezidenti etib saylandi.
Ochilboy Ramatov mazkur lavozimda Umid Ahmadjonovni almashtirdi. Tadbirda qatnashgan “Daryo” muxbirining ma’lum qilishicha, Ramatovning nomzodi Toshkent shahar futbol federatsiyasi tomonidan ko‘rsatilgan. Saylovda Ramatovdan boshqa nomzod bo‘lmagan.
Ramatov tashkilot rahbari sifatida ilk nutqida milliy futbolda muammolar ko‘pligini tan olib, futbolni eng quyi pog‘onalardan boshlab rivojlantirish zarurligi, bolalar futboliga katta e’tibor qaratish kerakligi haqida gapirgan.
Ochilboy Ramatov 1962-yil Xorazm viloyatining Shovot tumanida tug‘ilgan. 1988-yili Toshkent temiryo‘l muhandislari institutini muhandis-mexanik mutaxassisligi bo‘yicha tamomlagan. Mehnat faoliyatini 1980-yil Urganch lokomotiv deposida mashinist yordamchisi lavozimida boshlagan. Institutni tamomlagach, Toshkent teplovozlarni ta’mirlash zavodining ustasi, teplovoz sexi boshlig‘i o‘rinbosari va vagon ta’mirlash sexi boshlig‘i bo‘lib ishlagan.1995-yil martida “O‘ztemiryo‘lmashta’mir” kompaniya bosh direktori etib tayinlangan. 2001-yil mayida “O‘zbekiston temir yo‘llari”ning bosh menejeri — bosh muhandisi lavozimida ish boshlagan. 2002-yildan buyon “O‘zbekiston temir yo‘llari”ning boshqaruv raisi. 2016-yil dekabridan O‘zbekiston bosh vazirining birinchi o‘rinbosari — Hududlarni kompleks rivojlantirish va kommunal soha, transport, kapital qurilish va qurilish industriyasi masalalari kompleksining rahbari.
Ochilboy Ramatov 2000-yilda “O‘zbekistonda xizmat ko‘rsatgan sanoat ishchisi” davlat unvoni bilan taqdirlangan. 2007-yilda “Fidokorona xizmatlari uchun” ordeni bilan, 2011-yilda “El-yurt hurmati” ordeni bilan taqdirlandi, 2013-yilda esa “O‘zbekiston qahramoni” unvoni berildi. Ochilboy Ramatov oilali, uch nafar qizi bor.
Izoh (0)