Diniy ekstremistik tashkilotlar faoliyatida ishtirok etgan, degan ayblov bilan uch yilga qamalgan Umid Abdullayevga nisbatan chiqarilgan sud hukmi o‘zgartirilib, u 4 oyu 22 kunda qamoqdan chiqarildi. Bu haqda O‘zA xabar bermoqda.
Garchi U. Abdullayev o‘ziga qo‘yilgan ayblarni qisman tan olgan bo‘lsa-da, sud tomonidan Jinoyat kodeksidagi og‘ir jazo belgilangani, yengillashtiruvchi jihatlar hisobga olinmagani sababli hukmga norozilik bildirdi.
Prokuraturaning sud hukmini o‘zgartirish bo‘yicha kiritgan e’tirozi va U. Abdullayevning advokati tomonidan apellyatsiya tartibida yozilgan shikoyat asosida ish qayta ko‘rib chiqildi. Ishni qayta ko‘rib chiqishni so‘rab, u yashaydigan mahalla, tumandagi jamoat tashkilotlari ham sudga iltimosnoma bilan murojaat qildi.
Jinoyat ishlari bo‘yicha Paxtakor tumani sudi binosida o‘tkazilgan viloyat apellyatsiya instansiyasi hay’ati ochiq sud majlisida jinoyat tafsiloti jamoatchilik ishtirokida muhokama qilindi. Sud muhokamasida Jinoyat ishlari bo‘yicha Jizzax viloyati sudi tomonidan U. Abdullayevga qonuniy jazo berilgani e’tirof etildi.
Biroq sud U. Abdullayevga nisbatan jazo qo‘llashda Jinoyat kodeksining 8-moddasida ko‘rsatilgan jinoyatni sodir etishda aybdor hisoblangan shaxsga nisbatan qo‘llanilgan jazo yoki boshqa huquqiy ta’sir chorasi odilona bo‘lishi, ya’ni jinoyatning og‘ir-yengilligi, aybning va shaxsning ijtimoiy xavflilik darajasiga muvofiq bo‘lishi lozimligi haqidagi talablarga rioya qilmagan. Shuning uchun apellyatsiya instansiyasi hay’ati prokuratura tomonidan e’tirozni, ayblanuvchining advokati fikrlarini muhokama qilib, uni qanoatlantirishga qaror qildi.
“Shu o‘rinda bunday jinoyatlar bo‘yicha har qanday norozilik yaqin vaqtlargacha hisobga olinmaganini ham qayd etish lozim”, — deyiladi xabada.
Viloyat apellyatsiya instansiyasi sudlov hay’ati mazkur jinoyat ishidagi yengillashtiruvchi jihatlarni, mahalladan berilgan ijobiy tavsifnomani, O‘zbekiston yoshlar ittifoqi tuman kengashi, “Nuroniy” jamg‘armasi tuman bo‘limining iltimosnomalarini inobatga olib, U. Abdullayevga chiqarilgan hukmni o‘zgartirdi. Unga nisbatan oylik ish haqining 20 foizini davlat daromadiga ushlab qolgan holda 3 yil axloq tuzatish ishlari jazosi tayinlandi.
U. Abdullayev 2017-yil 2-sentabrdan 2018-yilning 23-yanvari, ya’ni apellyatsiya sudiga qadar 142 kun — 4 oy 22 kun qamoqda o‘tirdi. Sud uning qamoqda o‘tirgan har bir kunini axloq tuzatish ishlarining uch kuniga tenglashtirib, jazoning 1 yilu 2 oy 6 kuni o‘talgan, deb hisobladi. Qolgan 1 yilu 9 oy 24 kun axloq tuzatish ishlariga almashtirilib, u sud zalidan ozod qilindi.
Avvalo, Prezidentimizga men kabi adashgan fuqarolarni kechirib, xatolarini tuzatishga imkon yaratib bergani uchun chin yurakdan rahmat aytaman. Menga ishonch bildirib, jazoni yengillashtirishni so‘rab sudga murojaat qilgan ota-onam, mahalla, jamoat tashkilotlarining ishonchini oqlashga astoydil harakat qilaman. Vatanimga sodiqligimni o‘zimning halol mehnatim bilan isbotlayman.Umid Abdullayev
Izoh (0)