Belgiyada o‘nlab qariya va bemorlarni o‘ldirgan “o‘lim ruhoniysi” sud qilinmoqda

Belgiyada katolik cherkov dyakoni (quyi unvonli ruhoniy) ustidan sud boshlandi, u kamida o‘n kishi, shu jumladan, o‘z onasini o‘ldirganlikda ayblanmoqda, deb yozadi Het Niewsblad.

Tergov versiyasiga ko‘ra, kasalxonada hamshir bo‘lib ishlagan Ivo Poppe o‘z qurbonlari venasiga havo kiritgan, bu qon tomirlarining bekilib qolishiga olib kelgan va o‘lim bilan tugagan. Mahalliy OAVlar tomonidan “o‘lim ruhoniysi” deb atalayotgan ayblanuvchi o‘z xatti-harakatlarini evtanaziya deb atab, buni keksa odamlar va davosiz kasallarga rahmi kelgani uchun qilganini aytmoqda.

Erkak o‘nlab kishilarga nisbatan evtanaziyani amalga oshirgani haqida o‘z ruhshunosiga gapirib bergach, 2014-yilda hibsga olingan edi.

Qurbonlar orasida Poppening ikki amakisi, qaynotasi va o‘z onasi ham bor. Ta’kidlanishicha, ayol so‘nggi vaqtlarda depressiyadan azob chekkan, ammo, uning shifokorlari fikricha, u ko‘ngilli ravishda evtanaziyaga qo‘l urmagan bo‘lardi.