Fransiyada qo‘lga olingan rossiyalik senator Sulaymon Kerimovga qisqa muddatga uyiga qaytishga ruxsat berildi

Rossiyalik senator va milliarder Sulaymon Kerimovga bemor qarindoshini yo‘qlash uchun Rossiyaga uch kunga borib kelishga ruxsat berildi. Bu haqda Nitssa prokurori Jan-Mishel Pretr ma’lum qildi, deya xabar beradi “RBK”.

U 21-yanvar kuni Fransiyaga qaytishi lozim.

Kerimov 2017-yilning 20-noyabrida Nitssa aeroportida qo‘lga olingan edi. Unga soliq to‘lashdan bo‘yin tovlash aybi qo‘yilgan.

Tergov ma’lumotlariga ko‘ra, Kerimov bir necha yil davomida Lojuvard qirg‘oqda 400 million yevrodan ortiq summaga 5 ta villa sotib olgan.

Ayni vaqtda, u xarid narxlarini kamaytirib ko‘rsatib, Fransiya g‘aznasiga o‘nlab million yevro miqdorida soliqlarni to‘lamagan.

Rossiyaning badavlat biznesmenlari ro‘yxatida 6,3 milliard dollar miqdoridagi mol-mulki bilan 21-o‘rinni egallab turgan Kerimov 40 million yevro garov evaziga ochiqda bo‘lib turibdi.

Aybi isbotlangan taqdirda, u 10 yilgacha bo‘lgan muddatga ozodlikdan mahrum etilishi mumkin.