O‘zbekistonda Bosh prokuratura Akademiyasi tashkil etiladi. Bu haqda “Faol tadbirkorlik, innovatsion g‘oyalar va texnologiyalarni qo‘llab-quvvatlash yili” davlat dasturi loyihasida ma’lum qilingan, deya xabar beradi “Xalq so‘zi”.
Unga ko‘ra, shu yil 1-mayga qadar tegishli normativ-huquqiy hujjat loyihasi ishlab chiqiladi.
Mazkur hujjatda prokuratura organlarining yagona majmuasini (o‘quv binolari, sport-sog‘lomlashtirish inshootlari va hokazo) qurish; prokuror-tergov xodimlari malakasini oshirish va ularni qayta tayyorlashning samarali tizimini yaratish; o‘qitishning innovatsion shakl va uslublarini, eng yangi pedagogik va axborot-kommunikatsiya texnologiyalari, masofadan o‘qitish va mustaqil ta’lim, interfaol va vaziyat mashg‘ulotlari, treninglar o‘tkazishni keng joriy etish; qonunchilikni takomillashtirish va yagona huquqni qo‘llash amaliyotini shakllantirish bo‘yicha ilmiy asoslangan xulosa va tavsiyalarni ishlab chiqish nazarda tutiladi.
Izoh (0)