Toshkent shahar bojxona boshqarmasi “Boshpochtampt” tashqi iqtisodiy faoliyat bojxona posti xodimlari tomonidan Turkiyadan yuborilgan pochta jo‘natmalaridagi ma’lumotlarni tahlil qilish davomida qonunbuzarlik holati aniqlandi, deb xabar beradi Toshkent shahar bojxona boshqarmasi axborot xizmati.
Jami og‘irligi 1120 kilogrammdan ortiq bo‘lgan ushbu jo‘natmalar 55 nafar fuqarolar nomiga yuborilgan bo‘lsa-da, jo‘natmalardagi manzil va bog‘lanish uchun telefon raqamlar aynan bir xil bo‘lib chiqdi.
Ularni qabul qiluvchi aslida bitta shaxs bo‘lib, bojxona xodimlarini chalg‘itish maqsadida turli ism-shariflardan foydalanilgani aniqlandi.
Shu tariqa qonunbuzarlar pochta jo‘natmalari orqali qiymati 150 million so‘mlik 3 ming donaga yaqin turli xildagi kiyim-kechaklarni olib kirishga uringan.
Yana bir holatda Toshkent shahar bojxona boshqarmasining “Chuqursoy texnik idora” chegara bojxona posti xodimlari respublika transport prokuraturasi xodimlari bilan hamkorlikda fuqaro M.Ismatov (maqoladagi barcha ism-shariflar o‘zgartirilgan) nomiga Xitoydan kelgan konteynerlarni bojxona ko‘rigidan o‘tkazish chog‘ida, yuk kuzatuv hujjatlarida ko‘rsatilgan umumiy qiymati 6690 AQSh dollariga teng “Ishlab chiqarish dastgohlari” bilan birga hujjatlarda ko‘rsatilmagan 3500 dona kosmetika va parfyumeriya tovarlari, 1650 dona cho‘g‘lanma elektrlampalar, 108 tonna shirinliklar hamda xo‘jalik tovarlari borligi ma’lum bo‘ldi. Dastlabki ma’lumotlarga asosan ushbu aniqlangan tovarlarning narxi salkam 920 million so‘mni tashkil etdi.
Konteynerni bojxona ko‘rigidan o‘tkazish vaqtida aniqlangan elektr cho‘g‘lanma lampochkalarining quvvati 500 Vattbo‘lib, Vazirlar Mahkamasining “Energiyani tejaydigan lampalar mahalliy ishlab chiqarilishini kengaytirish chora-tadbirlari to‘g‘risida”gi qarori talablariga binoan 2017-yilning 1-yanvaridan boshlab bu turdagi mahsulotlarni realizatsiya qilish taqiqlangan.
Hozirda mazkur holatlar yuzasidan bojxona tekshiruvlari va surishtiruv jarayonlari davom ettirilmoqda.
Izoh (0)