O‘zbekistonda Google kompaniyasining 2017-yil oktabrida taqdim etilgan Pixel 2 smartfoni sotila boshladi, deb yozadi “Mobinfo.uz”. Pixel 2 dizayni avvalgi avlod qurilmasinikiga juda o‘xshash, ammo qizil rangdagi quvvat olish tugmasi bilan farqlanadi. Bundan tashqari, Google 3,5 millimetrli portdan voz kechib, USB Type-C portiga o‘tdi. Displey “doim yoniq” (Always-On) rejimini qo‘llab-quvvatlaydi.
Smartfonda siqishni boshqarish imkoniyatiga ega Active Edge sensorli qirra bor. Yana bir o‘ziga xoslik shundan iboratki, mikrofon doimo faol bo‘lib, atrofdagi musiqani kuzatib yuradi va istalgan lahzada foydalanuvchiga uning yaqinida qanday musiqa chalinayotganini ko‘rsatib turadi.
Google Pixel 2 5 dyuymli va 1920×1080 pikselli OLED displeyga, Pixel 2 XL esa 6 dyuymli va 2880×1440 pikselli ekranga ega. Pixel 2, shuningdek, 12 megapikselli asosiy va 8 megapikselli old kamera, Qualcomm Snapdragon 835 protsessori, 4 Gb tezkor va 64 Gb doimiy xotira (microSD uchun slot yo‘q), old stereodinamiklar, 2700 mA/soat sig‘imli akkumulyator bilan jihozlangan. Qurilma Android 8.0 Oreo operatsion tizimida ishlaydi.
Toshkentning “Malika” savdo markazida Google Pixel 2 (64 Gb) 5,7 million so‘mdan sotilmoqda. Taqqoslash uchun, AQShda uni 649 dollarga sotib olish mumkin.
Ushbu qurilmani ko‘rsatilgan narxda sotib olishga “Daryo” nashri kafolat bermaydi. Qurilma va uning narxi haqidagi axborot faqat tanishish uchun taqdim etilgan.
Izoh (0)