Putin Rossiyada 20 mln kishi qashshoqlikda yashayotganini ma’lum qildi

Rossiya prezidenti Vladimir Putin mamlakatdagi hal etilmagan asosiy muammolardan biri kun ko‘rish minimumidan past daromadga yashayotganlar soni ko‘pligi ekanligini ma’lum qildi. Bu haqda “RBK” xabar bermoqda. 

Putinga ko‘ra, hozirda Rossiyada 20 million qashshoq bo‘lib, yaqinda bu raqam 15 million kishini tashkil etayotgandi. 

“Oxirgi yillar iqtisodiyotidagi inqirozli ko‘rinishlar, neft narxining pasayishi, tashqi cheklovlar o‘zining qora ishini qildi va qashshoqlikda yashayotgan kishilar soni, afsuski, ortdi. 20 million — bu haddan ziyod ko‘p”, — dedi Rossiya prezidenti. 

Rossiya hisob palatasi raisi Tatyana Golikova oldinroq mamlakatda joriy yil birinchi choragida qashshoqlar soni 2 million kishiga ko‘payib, 22 million kishiga yetganini bildirgandi. 

Mehnat va ijtimoiy himoya vaziri Maksim Topilinning aytishicha, Rossiyadagi ehtiyojmand oilalarning 60 foizi bolali oilalar hisobiga to‘g‘ri keladi.