Boxing day. “Yunayted” o‘z uyida ham ochko yo‘qotdi. “Tottenhem” va “Liverpul” esa 5 tadan gol urdi

APL klublari Boxing day o‘yinlarida davom etadi. Hozircha mavsum 20-turining 8 ta o‘yiniga yakun yasaldi.

“Siti”ni quvish bilan band bo‘lgan “Manchester Yunayted” futbolchilari ketma-ket ikkinchi o‘yinda ochko yo‘qotdi. Bir tur avval “Lester”ga qarshi o‘yinda g‘alabani qo‘ldan chiqargan Mourinyo shogirdlari, bu safar xuddi o‘sha hisobda “Byornli” bilan durang o‘ynadi — 2:2. Zlatan Ibrahimovich bellashuvni asosiy tarkibda boshlagandi. O‘tkazib yuborilgan 2 ta goldan keyin ikkinchi bo‘limdayoq shved futbolchisi maydonda ko‘rinmadi. Uning o‘rniga tushirilgan Lingard esa “Yunayted”ni qutqarib qoldi.

Yurgen Klopp boshqaruvidagi “Liverpul” futbolchilari bir tur avval “Arsenal” bilan ochiq futbolda 3:3 hisobini qayd etgandi. Bu safar “mersisayd” klubi “Suonsi” darvozasiga javobsiz 5 ta gol urishni uddaladi. Bu Klopp jamoasining mavsum boshidan buyon 10-yirik g‘alabasi bo‘ldi. Shularning 3 tasi Chempionlar Ligasida qo‘lga kiritilgan.

“Tottenhem” futbolchilari Harri Keynni qahramonga aylantirish uchun maydonga tushib, “Sautgempton” ustidan yirik g‘alabaga erishdi. Pochettino jamoasi “Siti” maydonidagi yirik mag‘lubiyatdan keyin, ketma-ket ikkinchi yirik g‘alabasini qo‘lga kiritdi. Mazkur o‘yindan keyin Harri Keyn mavsumdagi xet-triklari sonini 8 taga yetkazib oldi va bu borada 2017-yilning tengsiz futbolchisi bo‘ldi.

Shuningdek, Londonning “Chelsi” klubi joniga ispan futbolchilar oro kirdi. Ellardays bilan mag‘lub bo‘lmayotgan “Everton” bu yurishini davom ettirdi. Manchester klublariga qarshi kechgan ketma-ket ikki o‘yinda so‘nggi daqiqada gol urib, mag‘lubiyatdan qutulib qolgan “Lester” esa “Uotford” maydonida imkoniyatni boy berdi.

Angliya Premyer-Ligasi 20-tur bellashuvlari 26-dekabr, seshanba

“Tottenhem” — “Sautgempton” 5:2

Gollar: Harri Keyn, 22 (1:0). Harri Keyn, 39 (2:0). Dele Alli, 49 (3:0). Son Xyon Min, 51 (4:0). Sofyan Bufal, 64 (4:1). Harri Keyn, 67 (5:1). Dushan Tadich, 82 (5:2).

“Chelsi” — “Brayton” 2:0

Gollar: Alvaro Morata, 46 (1:0). Markos Alonso, 60 (2:0).

“Xaddersfild” — “Stok Siti” 1:1

Gollar: Tomas Ins, 10 (1:0). Ramadan Sobxi, 60 (1:1).

“Uotford” — “Lester” 2:1

Gollar: Riyod Maxrez, 38 (0:1). Molla Vage, 46+ (1:1). Kasper Shmeyxel, 65-avt (2:1).

“Manchester Yunayted” — “Byornli” 2:2

Gollar: Eshli Barns, 3 (0:1). Stiven Defur, 36 (0:2). Jessi Lingard, 53 (1:2). Jessi Lingard, 91+ (2:2).

“Vest Bromvich” — “Everton” 0:0

“Bornmut” — “Vest Hem” 3:3

Gollar: Jeyms Kollinz, 7 (0:1). Den Gosling, 29 (1:1). Natan Ake, 57 (2:1). Marko Arnautovich, 82 (2:2). Marko Arnautovich, 89 (2:3). Kallum Uilson, 91+ (3:3).

“Liverpul” — “Suonsi” 5:0

Gollar: Filippe Koutinyo, 6 (1:0). Roberto Firmino, 52 (2:0). Trent Aleksander-Arnold, 65 (3:0). Roberto Firmino, 66 (4:0). Aleks Oksleyd-Chemberlen, 83 (5:0).

27-dekabr, chorshanba“Nyukasl” — “Manchester Siti” 00:45

28-dekabr, payshanba“Kristal Pelas” — “Arsenal” 01:00