Vyetnamning janubiy sohillariga “Tembin” tayfuni yopirilgani tufayli 650 mingdan ortiq kishi evakuatsiya qilindi, deb xabar beradi “TASS”.
Tabiiy ofat oqibatlari bilan kurashish bo‘yicha milliy kooordinatsiya qo‘mitasining ma’lum qilishicha, 26-dekabr kuni tunda “Tembin” mamlakat janubidagi Mekong daryosi hududiga yetib boradi.
Hozirgi davrda janubiy provinsiyalar mansabdor shaxslari mahalliy aholini tabiiy ofatdan himoya qilish uchun hozirlik ko‘rmoqda. Kuchli yomg‘ir Filippin janubidagi kabi suv toshqinlari va ko‘chkini keltirib chiqarishi mumkin. Filippinda “Tembin” tayfuni so‘nggi bir necha kun ichida 200 kishining o‘limiga sabab bo‘ldi.
“Tembin” Vyetnamda mazkur mavsumda yuz bergan o‘n oltinchi kuchli to‘fon hisoblanadi. Rasmiy ma’lumotlarga ko‘ra, joriy yilning 11 oyi mobaynida Vyetnamda tayfunlar keltirib chiqargan suv toshqinlari oqibatida 390 kishi halok bo‘ldi va bedarak yo‘qoldi, shuningdek 650 nafardan ortiq kishi jarohat oldi.
2017-yilda mamlakat tabiiy ofatdan 2,3 milliard dollar zarar ko‘rdi.
Izoh (0)