Checheniston rahbari Ramzan Qodirov O‘zbekiston Prezidenti Shavkat Mirziyoyevni prezidentlikka kirishganiga bir yil to‘lgani bilan tabrikladi. Bu haqda u o‘z Instagram’ida post qoldirdi.
O‘zbekiston Prezidenti bilan birga tushgan surati ilova qilingan postda Qodirov Shavkat Mirziyoyev Islom akademiyasini tashkil etish to‘g‘risida qaror imzolagani, bu nafaqat O‘zbekiston, balki butun musulmon dunyosi uchun ulkan ahamiyatga ega ekanligini yozgan. “Qaror Shavkat Miromonovich prezidentligining ikkinchi yili boshlanadigan kunda qabul qilingani ramziy ma’noga egadir”, — deyiladi xabarda.
“O‘z mamlakatini gullab-yashnayotgan o‘lkaga aylantirish uchun tajriba, iroda, donishmandlik va samimiy intilishga ega bo‘lgan islom dunyosining buyuk siyosiy arbobi Shavkat Miromonovich bilan tanishganimdan baxtiyorman. U 13 yil davomida hukumatni boshqargan, iqtisodiyotni biladi, mamlakatdagi barcha muammolarni va ularni hal qilish yo‘llarini biladi. Eng asosiysi — Mirziyoyev o‘z xalqini, o‘z Vatanini sevadi, O‘zbekistonga ilgarigi shuhrati va qudratini qaytarish uchun barcha kuchi va bilimini sarflashga tayyor”, — deya qayd etdi Checheniston rahbari.
U ikki mamlakat va ikki xalq o‘rtasidagi aloqalar kundan-kun kengayishi va mustahkamlanishiga ishonch bildirgan holda, Shavkat Mirziyoyevni O‘zbekiston Prezidenti lavozimiga kirishganiga bir yil to‘lgani munosabati bilan qutlab, mustahkam sog‘liq va omonlik tilab qoldi.
https://www.instagram.com/p/BcyHpM4HFa6/?taken-by=kadyrov_95
Izoh (0)