Perulik ayollar daraxtlar bilan nikohdan o‘tdi   

Peru poytaxti Lima shahrida bir necha ayol daraxtlar bilan ramziy ma’noda turmush qurish uchun xiyobonga yig‘ildi. Bu haqda Daily Mail xabar bermoqda.

Kelinlar “yashil kuyovlari”ga umrining oxiragacha g‘amxo‘rlik qilishga ont ichdi.

Marosimda rohib vazifasini bajargan “Yashil yuraklar” ekologik tashkilotining yetakchisi Richard Torres ayollar va daraxtlar o‘rtasida nikoh qayd etilganini e’lon qildi.

Shundan so‘ng marosimga yig‘ilganlar “kelin-kuyovlar”ning ustiga barglar sochib, ularni qutladi.

Torresning fikricha, marosim Peru aholisiga daraxtlar o‘ta muhim va ular ham g‘amxo‘rlikka muhtoj ekanligini eslatish maqsadida tashkil etildi.

U mana shunday tadbirni yana bir nechta davlatda o‘tkazishni rejalashtirmoqda va shu tarzda minglab daraxtlarni qutqarib qolishga muvaffaq bo‘ladi.