Gulistonda “Davlat va jamiyat o‘rtasidagi muloqot rivojida ombudsmanning o‘rni” mavzusida seminar bo‘lib o‘tdi. Bu haqda O‘zA xabar bermoqda.
Oliy Majlisning Inson huquqlari bo‘yicha vakili (ombudsman), Yevropada xavfsizlik va hamkorlik tashkilotining O‘zbekistondagi loyihalari koordinatori ofisi, Sirdaryo viloyati hokimligi, viloyat kasaba uyushmalari tashkilotlari birlashmasi hamkorligida tashkil etilgan tadbirda huquqni muhofaza qilish idoralari, viloyat xotin-qizlar qo‘mitasi, “Mahalla” xayriya jamoat fondi, “Nuroniy” jamg‘armasi viloyat bo‘limlari mas’ullari, OAV xodimlari ishtirok etdi.
Seminarda 2017—2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasi mazmun-mohiyati va ahamiyatiga alohida e’tibor qaratilib, u asosida qabul qilingan dasturlar, amalga oshirilayotgan ishlar xususida atroflicha ma’lumot berildi.
O‘zbekiston Respublikasi Oliy Majlisining Inson huquqlari bo‘yicha vakili (ombudsman)ning Sirdaryo viloyatidagi mintaqaviy vakili K.Oqbo‘tayevning “Ombudsmanning mintaqaviy vakil instituti va uning mahalliy davlat hokimiyati organlari va fuqarolik jamiyati institutlari bilan hamkorlik yo‘nalishlari” mavzusidagi ma’ruzasi tinglandi.
– 2017-yilning 9 oyi davomida Oliy Majlisning Inson huquqlari bo‘yicha vakili (ombudsman)ning Sirdaryo viloyati bo‘yicha mintaqaviy vakiliga 13 yozma va 7 og‘zaki murojaat kelib tushdi va barchasi o‘z vaqtida ijobiy hal etildi, – deydi K.Oqbo‘tayev. — Masalan, Sirdaryo tumani Shirin mahallasida yashovchi fuqaro Nozigul Barotovaning joriy yil 20 iyul kuni mahallasidagi umumiy foydalanish uyiga doimiy ro‘yxatga qo‘yishdagi muammolar va ushbu masalada qonuniy yordam ko‘rsatilishini so‘rab yo‘llagan arizasi atroflicha o‘rganildi va doimiy ro‘yxatga qo‘yilishi ta’minlandi.
Seminar doirasida ariza bilan murojaat qilgan fuqarolar qabul qilindi va muammolar yechimini topishda amaliy ko‘mak ko‘rsatildi.
Tadbirda sud-huquq tizimini isloh qilish, fuqarolarning ijtimoiy faolligini oshirish, Oliy Majlisning Inson huquqlari bo‘yicha vakili (ombudsman)ning mintaqaviy vakillari faoliyatini yanada takomillashtirish, davlat va jamoat tashkilotlari bilan hamkorligini mustahkamlash yuzasidan fikr almashildi.
Izoh (0)