Samarqand viloyatida oila qurayotgan yoshlarning oilaga bo‘lgan jiddiy munosabatini shakllantirish, oilaning mustahkamligida er-xotinning inoqligi xususida tushuntirishlar berish maqsadida ko‘plab uchrashuvlar tashkil etilmoqda. Bu haqda O‘zbekiston musulmonlari idorasi matbuot xizmati xabar bermoqda.

Foto: “Muslim.uz”

“Uchrashuvlar joylardagi FHDYo (fuqarolik holati dalolatnomalarini yozish) bo‘limlarida yosh oila quruvchilar bilan olib borilib, ular tobora takomillashib, sermazmunlik kasb etib bormoqda”, — deyiladi xabarda.

Oila muqaddasligi, mas’uliyati, er-xotin vazifasi, burch va majburiyatlari haqidagi nikoh rishtasining mustahkamligini ta’minlovchi nasihatlar bilan boshlangan 5-dekabrdagi uchrashuvda yoshlarning dunyoqarashi, qarshisida turgan hayotining yangi bosqichi bo‘yicha tasavvuri o‘rganildi.

Yoshlarning aksariyati dabdaba tarafdori emas va imkon qadar ota-onalariga yengillik bo‘lishini istashini ma’lum qilgan.

Bulung‘ur tumani FHDYo bo‘limidagi suhbat davomida kollej talabalari tomonidan qaynona-kelin munosabatlariga bag‘ishlangan sahna ko‘rinishi ham namoyish etildi.