Qirg‘iziston Jo‘qorg‘i Kengashining “Respublika — Ata Jurt” fraksiyasi deputati Umbetali Kidiraliyev Yaponiyadan 2014-yilda olib kirilgan radiatsiya foni yuqori bo‘lgan avtomobillar masalasini ko‘tardi, deb yozadi KNews.

Foto: KNews

Parlamentariyning so‘zlariga qaraganda, unga 150 ga yaqin fuqaro ushbu masalani hal qilish iltimosi bilan murojaat qilgan.

“Avtomobillar 2014-yilda kiritilgan, biroq ular ‘Shimoliy’ bojxona postidan ichkariga kiritilmagan. Respublika hukumatining 2016-yil 21-noyabrdagi topshirig‘iga binoan bu masala bir oy muddatda hal etilishi lozim edi, biroq muammo hozirga qadar cho‘zilib kelmoqda”, — deydi u.

Bundan tashqari, Kidiraliyev bu avtomobillar qanday qiymatda bojxona rasmiylashtiruvidan o‘tkazilishi lozimligiga qiziqish bildirdi.

“2014-yilda bojxona rasmiylashtiruvidan o‘tkazish ming dollar edi, Yevropa iqtisodiy ittifoqiga qo‘shilgandan keyin qiymat 4—5 ming dollarni tashkil etmoqda. Ularni qanday narxda rasmiylashtirish kerak?” — qiziqdi deputat.