O‘zbekiston Iqtisodiyot vazirligi va Moliya vazirligi rahbarlari o‘zgardi. Bu haqda “Kun.uz” va “Kommersant.uz” nashrlari o‘z manbalariga asoslanib xabar bermoqda; avvalroq bu haqda Telegram’dagi @davletovuz kanalida axborot paydo bo‘lgandi.
Xabar berishlaricha, 2016-yil dekabridan beri Moliya vazirligiga rahbarlik qilib kelgan Botir Xo‘jayev iqtisodiyot vaziri etib tayinlangan (u 2006—2009-yillarda ham shu vazirlikni boshqargan). Iqtisodiyot vazirligining avvalgi rahbari Galina Saidova iste’foga chiqarilgan. Saidova xonim 2011-yildan beri vazirlik rahbari edi.
O‘z navbatida, Botir Xo‘jayevning Moliya vazirligida bo‘shab qolgan o‘rnini bosh vazir o‘rinbosari — iqtisodiy rivojlantirish, tarkibiy o‘zgartirishlar, investitsiyalar, bank va moliya tizimini isloh qilish, erkin iqtisodiy va kichik sanoat zonalari faoliyatini muvofiqlashtirish masalalari kompleksi rahbari Jamshid Qo‘chqorov egallagan.
Botir Xo‘jayev o‘z vaqtida, Iqtisodiyot vazirligi va Moliya vazirligidan tashqari, Davlat arxitektura va qurilish qo‘mitasi (2009—2011-yillarda), Davlat soliq qo‘mitasi (2000—2002)ga rahbarlik qilgan. 2005—2006-yillarda O‘zbekiston Prezidentining ijtimoiy-iqtisodiy masalalar bo‘yicha Davlat maslahatchisi bo‘lgan.
53 yoshli Jamshid Qo‘chqorov 2005—2017-yillarda O‘zbekiston moliya vaziri birinchi o‘rinbosari, 1997—2005-yillarda moliya vaziri o‘rinbosari, 1995—1996-yillarda Markaziy bank raisi o‘rinbosari lavozimlarida faoliyat ko‘rsatgan.
Professor Galina Saidova (1956-yilda tug‘ilgan) 2002—2010-yillarda Iqtisodiyot vazirligida turli (vazirlik huzuridagi qo‘mita raisligidan vazirning birinchi o‘rinbosarigacha bo‘lgan) lavozimlarda ishlagan, 2010—2011-yillarda Tashqi iqtisodiy aloqalar, investitsiyalar va savdo vazirligini boshqargan. 2011-yil avgustidan beri iqtisodiyot vaziri edi.
Izoh (0)