Misr havo kuchlari aviazarbalar orqali Sinay yarim oroli shimolidagi Ar-Raud masjidida sodir bo‘lgan teraktga bog‘liq terrorchilarning bir nechta transport vositalarini hamda qurol-yarog‘ saqlanadigan omborlarini yo‘q qildi. Bu haqda Al Arabiya telekanali mamlakat qurolli kuchlari vakili Tamer Rifaiyga tayanib ma’lum qildi, deb xabar berdi “RIA Novosti”.
“Terrorchilarni ta’qib etish jarayonida havo kuchlari masjidga hujum uyushtirgan qonli terakt ishtirokchilarining bir nechta transport vositalarini yo‘q qilishga muvaffaq bo‘ldi”, — deya Rifaiy so‘zlarini keltiradi telekanal. Uning qo‘shimcha qilishicha, jangarilarning qurol-yarog‘ va o‘q-dorilar saqlanadigan omborlari butunlay yakson qilingan.
Shuningdek, telekanalning qayd etishicha, teraktdan keyin Misr va G‘azo sektori chegarasida joylashgan Rafah shahridagi nazorat-o‘tkazish punkti yopib qo‘yilgan.
Oldinroq Misrda 235 kishining hayotini olib ketgan teraktga aloqador 15 radikal yo‘q qilingani xabar berilgandi.
Izoh (0)