NYT: saudiyalik shahzodalarning ko‘pchiligi pul evaziga ozodlikka chiqishga rozi bo‘ldi

Korrupsiyada ayblangan saudiyalik shahzodalar va milliarderlarning ko‘pchiligi ozodlik evaziga o‘z mablag‘larining bir qismini davlatga berishga rozi bo‘ldi, deb yozadi “Gazeta.ru”. Bu haqda valiahd shahzoda Muhammad bin Salmon Al Saud The New York Times’ga bergan intervyusida ma’lum qildi.

Valiahd shahzoda jurnalistlarga aytib berishicha, korrupsiya masalasi uning mamlakatida juda dolzarb bo‘lib turgan. 2015-yilda hukumat “eng yuqoridagi” poraxo‘rlik haqida barcha zarur dalillarni yig‘ishga qaror qilgan. Natijada qariyb 200 ism-sharifdan iborat ro‘yxat hosil bo‘lgan.

“Biz ularga o‘zimizda bor barcha hujjatlarni ko‘rsatdik, ular bilan tanishib chiqqach, ularning 95 foizi sudgacha olib bormasdan hal qilishga qaror qildi”, — dedi u.

Bu shuni bildiradiki, ular ozodlik evaziga o‘z mablag‘larining bir qismini yoki ularga tegishli kompaniyalardagi ulushini berib yuborishga tayyor. Korrupsiyada ayblanganlarning yana 1 foizi aybsiz deb e’lon qilindi, 4 foizi esa buni sudda isbotlamoqchi.

Muhammad bin Salmon Al Saudning hisob-kitoblariga ko‘ra, Saudiya Arabistoni g‘aznasiga jami 100 milliard dollar kelib tushgan.