31-oktabr kuni Nyu-Yorkda odamlar ustiga yuk mashinasi haydagan O‘zbekiston fuqarosi Sayfullo Soipovga qarshi ayblovlar ilgari surildi. U terrorchilik va qotillikda ayblanmoqda, deb xabar qiladi “RIA Novosti”.
Umumiy hisobda Soipov sakkiz qotillikda (halok bo‘lganlar soniga ko‘ra), 12 qotillikka qasd qilishda (yaradorlar soniga qarab), IShID terrorchi guruhiga yordam berishda, shuningdek, zo‘ravonlikda va transport vositasini zararlashda ayblanmoqda.
Ayblov xulosasi 22 banddan iborat bo‘lib, hakamlar hay’ati tomonidan chiqarildi. Nyu-York Janubiy okrugi prokurori hujjatlarida aytilishicha, shu xulosa asosida Soipov sud oldida javob beradi.
Ayblovning ikki bandi bo‘yicha Soipovga nisbatan umrbod qamoq yoki qatl hukmlari o‘qilishi mumkin.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)