Rossiyaliklarning uchdan ikki qismidan ko‘prog‘i (68 foiz) xokkeychi Aleksandr Ovechkinning mamlakat amaldagi prezidenti tarafdorlarining Putin Team (“Putin jamoasi”) harakatini tuzish tashabbusini qo‘llab-quvvatlamoqda. Bu haqda Butunrossiya jamoat fikrini o‘rganish markazi hisobotida ma’lum qilindi, deya xabar beradi “Vedomosti”.
Ovechkinning fikri ma’qul bo‘lganlar orasida 45 dan 59 yoshgacha bo‘lgan kishilar (73 foiz) va pensionerlar (72 foiz), shuningdek, kichik shaharlar (70 foiz) va chekka qishloq aholisi (71 foiz) ulushi yuqori bo‘ldi.
Putin Team tashabbusiga qarshilar ulushi ayniqsa Moskva va Sankt-Peterburgda ko‘p — 12 foiz. Bu mamlakat bo‘ylab o‘rtacha ko‘rsatkichdan ikki barobar oshiq.
Rossiyaliklarning 22 foizi Putin Team tuzilishiga befarq ekanligini tan oldi. Bunday kishilar ulushi ayniqsa 25-34 yoshlilar orasida ko‘p (30 foiz).
Shunisi ham borki, markaz hisobotida rossiyaliklarning aksariyati (83 foiz) Putin Team tuzilgani haqida umuman ma’lumotga ega emasligi qayd etilgan.
Aleksandr Ovechkin Rossiya prezidentini qo‘llab-quvvatlovchi Putin Team jamoatchilik harakati yaratilishi haqida 2-noyabr kuni e’lon qildi. Keyinchalik shaxmatchi Sergey Karyakin, xokkeychi Yevgeniy Malkin va basketbol murabbiysi Yevgeniy Gomelskiy unga qo‘shilishlarini ma’lum qildi.
Izoh (0)