O‘zbekiston milliy terma jamoasi a’zosi hisoblangan Sardor Rashidov “Al-Jazira” safida navbatdagi golini urdi.
U to‘p suradigan klub BAA Liga Kubogida “An-Nasr”ni yirik hisobda taslim etdi. Avvaliga Amirlik termasi hujumchisi Ali Mabhut hisobni ochgan bo‘lsa, keyinroq Rashidov o‘z nomini tabloga yozdirdi. 2-bo‘limda esa o‘zbekistonlik vinger golli pas berdi.
BAA Liga Kubogi guruh bosqichi shaklida o‘tkaziladi. 3-turdan keyin “Al-Jazira” turnir jadvalida peshqadam bo‘lib turibdi. Mamlakat chempionatida esa Rashidov va jamoasi 7-turdan keyin 6-o‘rinni egallab turibdi. Vaholanki, jamoa liganing amaldagi g‘olibi hisoblanadi.
BAA Liga Kubogi 3-tur o‘yinlari 10-noyabr, juma
“An-Nasr” — “Al-Jazira” 0:3
Gollar: Ali Mabhut, 21 (0:1). Sardor Rashidov, 26 (0:2). Ahmad Al-G‘iloniy, 65 (0:3).
“Al-Jazira” BAA chempioni sifatida 6—16-dekabr kunlari bo‘lib o‘tadigan klublar o‘rtasidagi Jahon Chempionatida ishtirok etadi. Uning ilk raqibi Yangi Zelandiya yetakchisi “Oklend Siti” bo‘ladi. Ketma-ket ikki g‘alaba “Al-Jazira”ga Madridning “Real” klubi bilan to‘qnashish imkonini beradi.
14-noyabr kuni O‘zbekiston milliy termasi BAAga qarshi Al-Ayn shahrida o‘rtoqlik o‘yini o‘tkazadi. Sardor Rashidov va qolgan legioner futbolchilar terma safiga jalb etilmagan. Katta ehtimol bilan Rashidov uchrashuvni muxlislar orasida kuzatadi.
Izoh (0)