Shimoliy Koreya davlat axborot agentligi 4-noyabr kuni maxsus bayonot bilan chiqish qildi. “Kommersant”ning yozishicha, unda, jumladan, shunday deyiladi: “AQShning KXDRga nisbatan dushmanona siyosati hamda yadroviy tahdidi saqlanib qolarkan, KXDR o‘zini himoya qilishi uchun zarur hisoblangan yadroviy to‘xtatib turish masalasini hech qachon muzokaralar stoliga qo‘ymaydi va o‘z yadroviy kuchlarini mustahkamlash yo‘lidan bir qadam ham ortga chekinmaydi”.
“KXDR o‘z yadroviy kuchlarini to‘liq shay qilishdek yakuniy maqsadiga erishish arafasida turgan bir mahal, AQSh Shimoliy Koreya uning gangsterlarga xos talablariga javob bera olishi haqida o‘ylashi va, xususan, yadroviy quroldan voz kechish bo‘yicha muzokaralar haqida orzu ham qilmasligi kerak”, — deyiladi agentlik bayonotida.
Avvalroq Shimoliy Koreya Tashqi ishlar vazirligining Shimoliy Amerika departamenti rahbari Soy Son Xi xonim KXDR o‘z yadroviy qurolini faqat va faqat “AQSh tomonidan bo‘ladigan tahdidlardan himoyalanish” maqsadida ishlab chiqayotganini ma’lum qilgan edi.
Uning ta’kidlashicha, KXDR “AQSh tomonidan bo‘ladigan doimiy tahdidlar” ostida qolgan va shu sababli ham yadroviy qurol hamda ballistik raketalarni ishlab chiqish g‘oyalaridan voz kechmaydi.
Izoh (0)