AQSh prezidenti Donald Trampning ma’lum qilishicha, Nyu-Yorkdagi teraktni sodir etishda gumon qilinayotgan kelib chiqishi o‘zbekistonlik Sayfullo Soipov AQShga “Grin kard” viza lotereyasi sharofati bilan kelgan. Bu haqda “TASS” xabar bermoqda.
Xabar berishlaricha, Tramp “Grin kard”ni bekor qilish tarafdori. AQSh prezidenti Sayfullo Soipovning “Grin kard” orqali kelganini ma’lum qilarkan, AQSh Senatidagi demokratik ozchilik yetakchisi Chak Shumerni bu lotereyani himoya qilayotgani uchun qoraladi.
Respublikachi-prezidentning qayd etishicha, u Amerika iqtisodiyotida ehtiyoj bo‘lgan kasbiy malakaga ega chet elliklarninggina AQShga ko‘chib kelishiga ruxsat beruvchi tizimni joriy etishni istayapti.
“Terrorchi bizning mamlakatimizga Chak Shumerning ko‘ngliga juda xush yoqadigan immigratsion vizalar lotereya dasturi orqali kelgan. Biz, demokratlar yoqlayotgan lotereya tizimi ortiq bo‘lmasligi uchun, qadr-qiymat omillariga asoslangan immigratsiya tizimi joriy etilishi uchun qat’iy kurash olib bormoqdamiz. Biz biroz qattiqqo‘lroq va aqlliroq bo‘lishimiz kerak”, — dedi Tramp.
31-oktabr kuni Nyu-York shahrida yengil yuk mashinasini haydab kelayotgan erkak sakkiz kishini bosib ketdi. OAV ma’lumotlariga ko‘ra, avtomobil kelib chiqishi o‘zbekistonlik 29 yoshli Sayfullo Soipov tomonidan boshqarilgan. AQSh ma’muriyati Soipov odamlarni qasddan bosgan deb hisoblamoqda va hodisani terakt deb baholamoqda.
Izoh (0)