Rio—2016 Olimpiadasidan keyin faoliyatini AQShda — professional boksda davom ettirishni istagan Fazliddin G‘oibnazarov, okean ortiga ustozi Abror Tursunpo‘latov bilan yo‘l olgandi.
O‘zbekistonlik sportchining Amerikadagi faoliyati muvaffaqiyatli start olib, u prof ringdagi dastlabki 3 ta jangining barchasida raqiblarini mag‘lub eta oldi. “Olamsport” nashrining ma’lum qilishicha, endi bokschining ustozi Abror Tursunpo‘latovga bo‘lgan talab ham ancha oshgan. WBO kamari qarshisida turgan rossiyalik sobiq jahon chempioni Sergey Kovalyov Tursunpo‘latovga birga ishlash taklifi bilan chiqqan.
Ha, Kovalyov taklif bilan chiqdi. Men unga agar barcha aytganlarimni bajarishga va’da bersa, ishlashga tayyor ekanim haqida aytdim va roziligini oldim.Endi kunning birinchi yarmida Fayzi bilan, ikkinchisida Kovalyov bilan shug‘ullanmoqdaman. Shunday ekan, har ikki bokschi bilan ishlash noqulaylik tug‘dirmaydi. Fayzining o‘zi ham Kovalyov bilan ishlashimni istadi. Chunki rossiyalik bokschi chempionlik jangi arafasida turibdi. Bu men uchun ham katta tajriba bo‘ladi.
Abror Tursunpo‘latov, boks murabbiyi
2013-yil jahon chempionligini qo‘lga kiritgan Sergey Kovalyov WBO kamari yo‘lida ukrainalik Vyacheslav Shabranskiy bilan jang qiladi. Kovalyov 34 yoshda, raqib esa 4 yoshga kichik. Ular 25-noyabr kuni Nyu-Yorkdagi Madison Square Garden arenasiga chiqib keladi.
WBO kamari bungacha amerikalik Andre Uordga tegishli bo‘lib turgandi. Biroq u boksdagi faoliyatini yakunlagach, kamar egasiz qoldi. Endi Kovalyov 2013-yilgi muvaffaqiyatini takrorlashga urinib ko‘radi.
Izoh (0)