Shvetsiya qutqaruvchilari bir necha kun avval qayiqda sayohatga chiqib, so‘ng bedarak yo‘qolib qolgan rossiyalikni kichik oroldan topdi, deb xabar beradi “RIA Novosti”.
Yoshi 30 dan oshgan rossiyalik 23-oktabr kuni Shvetsiya poytaxti Stokgolmdan Ispaniya tomon sayohatga chiqqan edi. Erkakning yaqinlari u bilan so‘nggi marta 25-oktabr kuni bog‘langan. Aloqa uzilib qolgach, qarindoshlari politsiyaga murojaat qilgan.
27-oktabr kuni qutqaruvchilar yo‘qolgan erkakka tegishli bo‘lgan qayiq bo‘laklari va buyumlarni topgan. “Biz yostiq, panel va taxta bo‘laklarini topdik. Har bir detal fojia yuz berganiga ishora qilardi”, — deydi Shvetsiya Dengiz ma’muriyati vakili Daniel Linblad.
Biroq bedarak yo‘qolgan rossiyalik shu kunning o‘zidayoq kichik orolchadan sog‘-salomat topildi.
U bir nechta usullardan foydalanib, qutqaruvchilar e’tiborini jalb qilishga uringan. Xususan, u qutqaruv jiletini silkitib turgan va moxlardan qoyaga HELP deb yozuv tushirgan.
Qutqaruvchilar uni vertolyot yordamida oroldan olib ketgan va shifoxonaga joylashtirgan. Shifokorlar uni tekshiruvdan o‘tkazib, erkak hech qanday tan jarohati olmaganini aniqladi.
Izoh (0)