Ispaniya hukumati qaroriga ko‘ra hokimiyatdan chetlatilgan Katalnoniya prezidenti Karles Puchdemon murojaat bilan chiqish qilib, kataloniyaliklarni hududning tashqi boshqaruviga “demokratik qarshilik ko‘rsatish”ga chaqirdi. Bu haqda Meduza xabar bermoqda.
Puchdemonning murojaatiga ko‘ra, u o‘z hukumatining iste’foga chiqarilganini tan olmagan. Uning ta’kidlashicha, Madridning harakatlari kataloniyaliklarning xohish-irodasiga zid va hudud aholisi tinch yo‘l bilan o‘z mustaqilligi sari harakatda davom etmog‘i lozim.
“Shu kungacha erishilgan yutuqlarni saqlab qolishning eng yaxshi yo‘li — 155-moddaga demokratik qarshilik ko‘rsatishdir”, — dedi Puchdemon.
Bu Puchdemonning Kataloniya mustaqilligi e’lon qilinishi va buning ortidan Ispaniya markaziy hukumati Kataloniyada tashqi boshqaruvni joriy etish haqida qaror qabul qilishidan keyingi ilk bayonotidir. Murojaat Barselonadan 100 kilometr masofada joylashgan Jirona shahrida yozib olingan.
Avvalroq Ispaniya hukumati kataloniyalik amaldorlar iste’fo haqidagi qarorga qarshilik ko‘rsatadigan bo‘lsa, ular hokimiyatni tortib olish (uzurpatsiya qilish) jinoyati alomati ta’qib etilishini ma’lum qilgan edi. Ispaniya prokuraturasi esa suddan Karles Puchdemonga qarshi isyon keltirib chiqarish ayblovini ilgari surishni so‘rashni rejalashtirayotganini bildirgan edi.
Kataloniya parlamenti 27-oktabr kuni hududning Ispaniyadan mustaqilligini e’lon qildi. Bunga asos sifatida 1-oktabr kuni o‘tkazilgan referendum ko‘rsatildi. Shundan so‘ng Ispaniya Senati Kataloniyada tashqi boshqaruvni joriy etish haqidagi hukumat qarorini ma’qulladi. Ispaniya markaziy hukumati Kataloniya rahbariyatini iste’foga chiqarish, yangi saylov muddatini belgiladi.
Izoh (0)