Donald Tramp 11 ta mamlakat qochoqlarini qabul qilish dasturini qat’iylashtirdi

Amerika Qo‘shma Shtatlari qochoqlarni qabul qilishda davom etadi, biroq Vashington 11 ta mamlakat fuqarolarini qabul qilish qoidalarini qat‘iylashtiradi. Bu haqda “RBK” xabar bermoqda.

Qonun hujjatiga kiritilgan o‘rgartirishlar Donald Tramp tomonidan imzolangan 120 kunga qochoqlarni qabul qilishga qo‘yilgan taqiqdan so‘ng kuchga kiradi.

120 kun 24-oktabr, seshanba kuni yakunlandi. Shu munosabat bilan Tramp Amerikaga qochoqlarni qabul qilish dasturini yangilash imkonini beruvchi qarorni imzoladi.

Memorandumda 11 ta mamlakat qochoqlarini qabul qilish yuzasidan xavotir aks etgan. Unda hukumat AQSh xavfsizligini ta’minlash uchun qanday chora-tadbirlar qabul qilinishi mumkinligi yuzasidan 90 kunlik muhokama o‘tkazilishi aytilgan.

Qo‘shimcha to‘siqlarga duchor bo‘lishi kutilayotgan 11 ta mamlakat fuqarolari hozirda yuqori darajadagi xavfsizlik tekshiruvidan o‘tkazilmoqda. Bu tekshiruv esa “Qochoqning xavfsizligi haqidagi konsultativ ariza” deb nomlanadi.