“Motor” nashri Vengriyaning Ikarus kompaniyasi tomonidan aeroportlar uchun mo‘ljallab ishlab chiqarilgan avtobuslar haqida ma’lumot to‘plab taqdim etdi.
1982-yilda Neoplan firmasi o‘z vaqtida eng katta bo‘lgan Jidda (Saudiya Arabistoni) aeroportida xizmat ko‘rsatishi uchun N980 aerodrom avtobusini taqdim etgan. 18 metrli yirik avtobus nafaqat o‘zining “g‘ildirak ustidagi buxanka” va ikki qavatli ekanligi bilan, balki turli balandlikka ko‘tarila oladigan ko‘prigi bilan ham ajralib turgan. Bu orqali yo‘lovchilar to‘g‘ridan to‘g‘ri samolyotga chiqishlari mumkin bo‘lgan.
Vengriyaning 100 o‘rindiqli Ikarus 692.01 PALT avtobusi yo‘lovchilarni mehmonxonadan to‘g‘ri samolyotga eltishda xizmat qilgan.
G‘oya shunday bo‘lgan: yo‘lovchi avtobsuga o‘tirishdan oldin o‘z yuklarini maxsus poddonga qo‘yadi, yuklar u yerdan yukxona bo‘linmasiga o‘tadi. Avtobus samolyot yoniga kelgach yuklar yana poddonga qaytadi va u samolyotga ortiladi. Yo‘lovchilar esa turli balandliklarga o‘zgara oladigan maxsus trap orqali samolyot ichiga kiradi.
Buning o‘ziga yarasha kamchiligi bo‘lgan: yo‘lovchilar bojxona ko‘rigi va ro‘yxatdan o‘tish amaliyotlarini avtobusga o‘tirishdan oldin yoki samolyot bortida amalga oshirish kerak bo‘lgan. Shu sababli PALT tizimidan voz kechishga qaror qilingan.
Oradan bir yil o‘tgach ikkinchi prototip — Ikarus 695 AeroPALT taqdim etilgan. Uning vazifasi yo‘lovchilarni “mehmonxona — samolyot” yo‘nalishi bo‘yicha tashish emas, balki “aeroport terminali — samolyot” bo‘lgan.
Ushbu avtobusga 692 modeliga nisbatan 70 nafar odam ko‘proq ketgan va uning trapi yanada balandroqqa ko‘tarila oladigan qilib ishlangan — 5 metr balandlikka qadar.
Vengerlar 1985-yilda Ikarus 692’ning ikkinchi avlodini yaratgan. U o‘zidan oldingi ajdodidan ancha soda ishlangan: alohida yuk bo‘lmasiga ega bo‘lmagan.
Shuningdek, to‘rtta burilish o‘qi hamda yuqoridagilar ichida eng qulay trapga ega bo‘lgan.
Uchta avtobus ham Moskvada bo‘lib o‘tgan Vengriya ko‘rgazmasida namoyish etilgan. Biroq Sobiq ittifoqidagi birorta respublikaning aeroporti ularga jiddiy qiziqish bildirmagan: qimmat, murakkab va o‘zgaruvchan iqlimga qanday bardosh berishi noma’lum.
Izoh (0)